PSG chhanhimtu Ferran Torres

Pathianni zan Ligue 1 khelhah champion lai Paris Saint-Germain chuan 2-2 in Rennes an inhnehtawkpui a, Barcelona aṭanga an lak thar Ferran Torres chuan goal hnih an chhuah hnuah an siphur sut zoin a club thar a chhanhim.

Roazhon Park, Rennes-a inkhelah mikhual team-in inkhel thunun zawk mah se goal an chhuah hmasa zawk a, first half-ah Sebastian Szymanski leh Esteban Lepaul te hmangin mualneituin hma an hruai.

PSG tan an Ousmane Dembele leh Joao Neves ten an chance neih an hlah ve ve a, player dang pawhin shot vawi eng emaw zat nei mah se goal hmaah an hriam tawk lo.

Second half-ah Luis Enrique-a'n a player thar pahnih Torres leh Mika Godts te a luhtir a, danglamna an thlen nghal. Spanish forward Torres-a'n minute 71-naah a hnampui Fabian Ruiz a ball pek chu khung nghalin an si phurh a sut ṭhen.

Kum 26 mi Torres-a'n a la duhtawk mai lo a, minute 82-naah Ruiz-a ball vawrh luh bawk chu goal kilah tak tauh lutin an siphurh a sut zo. Goal a khung theih nan Torres-a chet kual dan chu striker ṭha bik chet dan a ni.

Enrique naute hi a vannei zawk an ni a, hun tawp hma hreta Ludovic Blas-a ball tauh chu William Pacho-a'n goal line-ah a lo dang hman a, PSG an him hlauh. Hun tawp zui nghalin team pahnihten point an insem.

Inkhelh banah Enrique chuan, "Rennes khan counter attack ṭha tak hmangin min barakhaih a, nidang aiin inkhelh a harsa zawk. Mahse a tawpah kan inhnehtawk thei ta hram a, khel chhe bik kan awm lo a, min ṭantute zawng zawng chungah lawm thu ka sawi bawk. Hei aia ṭha hian kan khel chhuah leh theih ngei ka beisei," a ti.

PSG goal khungtu Torres pawhin, "Goal ka khung avangin ka lawm a, mahse kan result kha lungawina tur niin ka hre lo. Match zawng zawngah chak vek kan duh chuan theihtawp kan chhuah a ngai," a ti bawk.