Liverpool an chak - hmabak a hautak nghal

European champion Liverpool-in an nomawi humhim an tumnaah kawng dik an zawh zel a, Thawhlehni zan khan an mikhual Genk chu 2-1 in an hneh.

Reds tana Georginio Wijnaldum goal hmahruai chu Belgian club tan Mbwana Samatta chuan chhanglet mah se Alex Oxlade-Chamberlain-a'n chakna goal a khung a, Anfield-ah mualneitu an chungnung. Group E inkhel dangah Napoli chuan 1-1 a Red Bull Salzburg an inhnehtawkpui avangin Liverpool hi group hmahruaitu an ni zui a, last 16 lut turin an dinhmun a ṭha ta hle. 

Liverpool fan-ten lawmna karah lawm lohna tur an nei a, December 17 hian darkar 24 chhungin match hnih an khelh a ngai dawn - League Cup quarterfinal leh FIFA Club World Cup semifinal inhnaih vang a ni. 

Liverpool-in kartawp Premier League match-ah Manchester City an mikhual dawn a, Jurgen Klopp-a'n he inkhel pawimawh hi rilrua dah chungin Jordan Henderson, Sadio Mane, Roberto Firmino leh Andy Robertson chu bench-ah a dah. 

Reds tan Georginio Wijnaldum chuan minute 14-na lekah Genk captain Sebastian Dewaest chetsual zarzoin goal hmahruai a khung a, Tanzanian striker Mbwana Samatta chuan minute 40-naah a sut zui. Liverpool tan midfielder Ox-a'n minute 53-naah a khung ve leh a, Genk-in a chhanletna tur an nei tawh lo. English midfielder hian Reds tana inkhel bul a ṭan match hnuhnung pathumah goal li a khung tawh!

Klopp tana manganna tur erawh tlarhnung phui thei lo hi a ni - match hnuhnung pakuaah vawi khat chiah goal chhuah loh an nei a, goal khung thiam bik City lakah ngaihngam a harsa dawn. 

Liverpool-in Genk an mikhual hma lawk hian League Cup-a an fixture tihchian a ni a, lawmna tur a awm lo. December 17 zan dar 1:15-ah Aston Villa nen quarterfinal an khel dawn a, Dec 18 zan dar 11:00-ah Club World Cup semifinal khelh zui a ngai dawn!

Round of 16-a Arsenal an hneh hnu lawk khan Jurgen Klopp chuan fixture thlak danglam a nih loh chuan Carabao Cup hi an hnuchhawn mai tur thu a sawi a, mahse EFL lam thuneituten ruahmanna thar an siam tur thuin an chhang. 

EFL hian Liverpool leh a nghawng tur club dang rawn chungin fixture an thlir nawn a, a tawpah a ṭha thei ang bera an hriatin thutlukna an siam ta - Reds tan a hautak dawn tih a chiang. Liverpool boss Klopp chuan, "Villa hi Qatar-a rawn kal mai turin kan sawm a ni," tiin fiamthu a thawh zui a, Reds coach-in December fixture hautak a hmachhawn dan tur hi hriat a châkawm tawh hle. 

EFL football services director Dave Cookson chuan, "Club-in an squad neih ṭhat dan bera ruahmanna an siam tur thu min hrilh avangin hetiang hian thutlukna kan siam," a ti a, Liverpool lam chuan squad pahniha an in ṭhen hran tur thu an sawi thung. 

Klopp-a'n academy player ṭhenkhat chu senior squad-ah dah chhoh an ngai dawn tihna a ni a, League Cup aiin Club World Cup an ngai pawimawh zawk ang. Buaina tur hi tlarhma a ni dawnin a lang a, bul ṭan regular Roberto Firmino, Sadio Mane leh Mohamed Salah bakah Divock Origi leh Rhian Brewster chiah an nei. Klopp-a hman thiam 4-3-3 nena hisapin a buaithlakna a ngaihtuah thiam theih. 

Midfield-ah hian Curtis Jones leh Harvey Elliott chiah hi coach thutlukna hnial ngam lo tur niin an lang a, Fabinho, Hendo, Wijnaldum, James Milner, Naby Keita, Ox, Adam Lallana leh Xherdan Shaqiri (inhliam) hi chu Qatar lama zin duh vek an ni ang. 

Goalkeeper-ah chuan Caoimhín Kelleher leh Andy Lonergan chu England-a cham bang chiang tura ngaih an ni a, tlarhnungah Joe Gomez hoin Ki-Jana Hoever, Yasser Larouci leh Sepp van den Berg te chu Qatar-a zin lo tura ngaih an ni. 

Napoli tan last 16 lut turin match khat chak tawk mah se Red Bull Salzburg mualah an chak zo lo a, Italian club chelh dingtu chu Erling Haaland bawk a ni. Kum 19 mi striker hian minute 11-naah penalty hmangin Austrian club goal hmahruai a khung a, Napoli-in Hirving Lozano hmangin chhanglet mah se goal dang an nei thei tawh lo. 

Haaland hian tun season inelna hrang hrangah match 22 khelin goal 23 a khung tling der tawh a, Champions League match li a khelhah goal sarih a khung tawh! Manchester United leh Liverpool-in an duh nia an sawi striker hi Champions League-a a match hmasa palia goal khung vek thei palina a ni a, Kylian Mbappe nen kum 20 tling lo chunga hetiang ti thei awmchhun an ni.