Spurs-in Savinho an la lut

Tun nipui transfer-a che na tak Tottenham Hotspur chuan Manchester City aṭangin Savinho an la lut leh ta a, London club hian City tana khelhna hmun chang lo player lakluh nan hian pound maktaduai 75 ngawt an seng!

Kum 22 mi forward hi season hmasa nipui transfer lai khan Spurs hian lakluh tumin an lo ngaihven tawh a, mahse, an hlawhtling lo. Mahse, Savinho-a'n Pep Guardiola hnuaiah beisei angin khelhna hmun a chang lo a, coach thar nei mah se, Spurs a pan ta.

Savinho man hi £75mtd-ah a tawp mai lo a, a khelh ṭhat dan a zirin Spurs hian £10mtd an pek belh leh a la ngai dawn a ni! A contract rei zawng hi, 'hun rei tak chhung atan' tia tarlan a ni.

Spurs player thar Savinho chuan, "Hun a duh deuh hlek a, mahse, tunah chuan Spurs ka zawm thei ta. Club ṭha takah, khawvela manager ṭha ber pawl enkawlna hnuaiah ka khel dawn a, ka phur hle.

"Coach nen kan inbiak rual khan, Spurs ka zawm ngei a ngai a ni, tih ka hrethiam. A sang thei ang ber ka thlen theih nana min puih a inhuam thu a sawi a, team anga kan thawh ho phawt chuan, chu chu kan hlen thei ang tih pawh ka hria," a ti a, Spurs a zawm chhan a sawi.

Savinho hian kum 2024 khan, French club Troyes aṭangin City chu £30.8mtd-in a zawm a, inelna hrang hrangah match 84 khela goal sarih khungin, assist vawi 16 a nei.

Spurs hian tun nipuiah Mateus Fernandes (West Ham), Sandro Tonali (Newcastle United) leh Jan Paul van Hecke (Brighton & Hove Albion) lak nan £312mtd an seng a, free transfer-in Marcos Senesi, Andrew Robertson leh goalkeeper Martin Dubravka an la lut bawk.

Mahse, Spurs hian an league match hmasa berah 3-0 ngawtin Brentford an ngam lo a, De Zerbi hian season tawp thleng a daih ang em, tih chu zawhna a ni ṭan mek.

Italian coach chuan a player thar chu fakin, "Savinho hian mual sirah team a tiṭha sawt dawn a, defender hmachhawn a hlau lo a, a thiamna hmanga game thlak danglam thei player a ni," a ti a, a fak hle.

Spurs hian duhtawk mai an la tum lo bawk. Egypt forward Omar Marmoush chu Manchester City aṭanga lakluh tumin an dawr mek bawk a, an lakluh ngei pawh a rinawm.

Tottenham hian zanin dar 12:15-ah League Cup second round an khel dawn a, Championship club Charlton Athletic an hmachhawn ang - League Cup second round-ah hian division hniam lam club, first round-a chak te leh, Premier League club, Europe-a inlan lote an inhmachhawn ṭhin.