Aron-a'n hattrick hmangin Chanmari an vul

Star Cement Mizoram Premier League Season 13 chu nimin khan khelh ṭan a ni ta a, Chanmari FC-in minute 14 chhung leka Aron Vanlalrinchhana hattrick hmangin Kanan FC an sawp.

Chanmari tan Aron bakah Lalruatsanga leh Suanngaihmuana ten goal khat ve ve a khung a, Kanan FC tana Crespo Vanlalhriatpuia goal chu mualpho lutuk tur hliahkhuhna chauh a ni.

Keipui hliam

Chanmari FC-in season liam ta khan I Day Football leh MPL-ah an champion a, mahse kumin I Day Football semifinal-ah Aizawl FC hneh loin nomawi an humhim thei lo.

Chhinga kaihhruai Chanmariin hliam an tuar a, IFL club hi keipui hliam tuar ang mai an ni a, Kanan FC an vanduai phah ta thung. KFC hian I Day Football-ah final hial thleng mah se MPL-ah Freddy Lallawmawma an chhawr thei tawh lo a, khelmuala team kaihruaitu Kanan tlangval awm lo hi an tuar hle.

Aron-a show

Chanmariin inkhel an thunun nghal a, inkhelh ṭantirh lamah Kanan han ṭang khawng mah se minute 20-na aṭangin an buai ṭan. Minute 15 chhungin goal li an chhuah a, inkhel chak tur a chiang nghal der.

Minute 20-naah Chanmariin freekick an hmu a, Aron-a'n goal kilah petin goal hmahruai a khung. Cherhlun tlangvalin pet chhe lo mah se Kanan keeper Lalrinzuala a che ṭha tawk lo.

Minute 24-naah Aron-a rawn inlar leh a, box pawn aṭangin mawi zetin goal kilah a pet lut. Kanan FC an talbuai a, Chanmari FC-in minute hnih hnuah Lalruatsanga'n a khung lehnghal. Aron-a ball pek a fing a, ball cross-tu Sawma'n a pet ṭha bawk.

Minute 34-naah Aron-a'n hattrick a siam der a, Sawma freekick chu wall-in dang mah se a per chu kawh zetin Aron-a'n a volley lut nghal. Chanmariin first half-ah goal li a khung bakah Kanan player K. Lalruatfela'n amah laka foul-tu a hnek avangin first half tawp hma chiahin red card a hmu a, Chanmarians dinhmun a ṭha hle.

A goal belh

Second half-ah Chanmariin goal engzat nge an khung belh dawn tia an thlir ṭhup laiin Sialhawk tlangval Crespo-a'n kawh zetin minute 55-naah a khung. Kanan tan beiseina thar awm mah se Chanmari FC an ṭha hret.

Chhinga hoten chance ṭhahnem tak an insiam a, minute 84-naah Amuana freekick pet chuan wall a per hnuah goal-ah a lut. Kanan keeper Rinzuala tan dan theih a ni lo.

Chanmariin 5-1 in hnehna an chang a, duhthusama ṭhain season bul an ṭan. Chhinga hote hian August 28, Zirtawpni zan dar 7:00-ah Mizoram Police a hmachhawn dawn a, fiahna hautak zawk a ni thei ang.