Villa-in Rafael Leao dawr dawn

Aston Villa chuan AC Milan forward Rafael Leao lak luh tumin inbiakna an nei ṭan a, Villa hian Portuguese forward hi seng luh ngei an duh avangin Milan hotute nen transfer tawp ni September 2, Nilaini zing hmaa inrem an tum niin khawthlang chanchinbute chuan an tarlang.

Kum 27 mi Leao season liam ta khan Serie A-ah match 29 khelin, goal kua leh assist pathum a nei a, hliam vanga a chawlh ngun avangin a inlan tam tawk lo. Leao ber hian chona thar hmachhawn a duh avangin chhuah a duh thu a sawi a, Milan hotute pawhin hralh thiang loah an dah tawh lo.

Hemi hnu lawk hian club tam lakin Leao an ngaihven a, mahse lak luh tumin hma an la lawk lo. Forward mamawh Villa an lo lang a, Unai Emery-a'n Leao a hmu tai hle.

Villa hi an striker rinrawl Ollie Watkins chu Al Hilal nen sawi zawm a ni a, a dinhmun a chian loh avangin Brighton & Hove Albion an hneh loh ṭum khan squad-ah hmuh tur a awm lo. Tammy Abraham leh kum 17 mi Brian Madjo te chu an inhliam avangin an la inlan thei lo bawk.

Tun dinhmunah Villa hian striker pangngai chhawr theih an nei lo a, Brighton lakah winger Emiliano Buendia chu striker angin Emery-a'n a chher chawp a, a hlawhtling lo.

Sporting Lisbon tan pawha khel tawh Leao hi 'centre forward' ang pawha chhawr theih a nih avangin an mamawh tak niin a lang a, hei bakah hian Villa hi Champions League khel tur an nih avangin squad tihchhah an mamawh tel bawk.

Leao hian a vanglai a hmang dawn chauh a, chhuah duh mah se 2028 thleng San Siro-ah contract a la neih avangin a man a tlawm a rinawm lo. Milan-in an chhiar zat hi chiang taka tarlan ni lo mah se, euro maktaduai 50 aiin a tlem dawn lo nia sawi a awm a, Villa-in sum an sen hnem a ngai dawn.

Tun nipuiah Villa hian Joao Gomes, Johan Manzambi, Matteo Ruggeri, Zion Suzuki, Modou Kéba Cissé te lak luh nan £148.5 mtd an hmang tling tawh a, Alejandro Garnacho leh Aaron Wan-Bissaka te loan-in an la lut bawk.

Spanish coach Emery hnuaiah beisei sang takin season ṭan mah se, an match hmasa berah an mualpho avangin Villa hian insiamṭhat an mamawh. Inenfiah an mamawh lai takin August 31, Thawhṭanni zanah champion lai Arsenal an la hmachhawn dawn zui!