Season tharah Kyrie a lo kir dawn

Hliam vanga kum khat chuang inkhel tawh lo, Kyrie Irving chu season tharah a lo kir tawh dawn niin khawthlang chanchinbuten an ziak a, Dallas Mavericks fan te tan thu lawmawm a ni.

Kum 34 mi Kyrie hian nikum March khan Sacramento Kings nen an inkhelh ṭumin a khup a tina a, a hliam hi endik a nih hnuah ACL vei lam chu a thler avangin rei tak a chawlh a ngai a, a let leh hun tur pawh sawi theih a ni lo.

Mahse kuminah American point guard hi a lo let leh thei tawh dawn nia sawi a awm a, a khel lai hmuh châkin Mavericks ṭantute awm ngaihna an hre lo ang.

Cleveland Cavaliers tan pawha khel tawh Kyrie hian 2023 khan Brooklyn Nets aṭangin Mavericks hi a zawm a, 2024 khan Luka Doncic nen inkawpin finals an hruai thleng. Mahse finals-ah a club hlui Boston Celtics chu 4-1 in an hneh lo thung.

Kyrie hian a career-ah vawi khat chiah championship title a la chawi a, a chawi hnuhnun ber hi 2016 daih tawh kha niin Golden State Warriors lakah an chakna three points a vawm lut nghe nghe.

Cavaliers a chhuahsan hnuah Celtics leh Nets tan beisei a pha lo a, Mavericks-ah erawh a khel ṭha thung. Season thara a lo kir hunah nomawi chawipui ngei a tum leh dawn

Mavericks hian June thla khan an head coach atan Dusty May an la lut a, kum 49 mi May hian Jason Kidd a thlak. Coach thar hnuaiah Kyrie a khelh tawh dawn avangin bakah, damkawr a nih avangin a khelh dan a inthlak tawh mai thei.

Hei bakah hian finals-an luh ṭuma a kawppui Slovenian point guard Doncic a awm tawh lo a, kum 19 mi Cooper Flagg nen an innghahna an nih a rinawm. Mahse Flagg hi 'rookie of the year' ni lai a nih avangin dah hniam a thiang lo thung.