FIA-in Indian hmeichhe naupang an fak

International motorsport huanga hming a chher mek, Indian driver Atiqa Mir chuan European karting-a a thiamna leh a hlawhtlinna avangin lirthei hmanga inelnaa hotu lu Fédération Internationale de l'Automobile (FIA) mit a lain fak a hlawh hle a, Atiqa hi kum 11 mi chauh a ni.

Kashmir tleirawl Atiqa hi tunah hian Europe-a karting series hrang hrang, kum 12-14 inkar inelnaah a inlan mek a, motorsports lama tawnhriat ngah zawkte kaihruaina hnuaiah a chet ṭhat avangin Indian zinga F1 Academy-in thlawpna a pek hmasa ber a ni.

FIA chuan thuchhuah siamin, "Atiqa Mir te anga thiamna neite hian miin motorsport an hmuh dawn a ṭha zawngin an thlak chho mek a, a hlawhtlinnate hian kan infiamna hma hun a en zia a lantir a ni.

FIA member club thlawpna nen Atiqa hian MENA Karting Championship Nations Cup-ah an ram aiawhin a lo chhuak tawh a, tunah chuan professional racer ni tura kawng dik zawhin international FIA Karting inelna hrang hrangah a tlan tan mek. Atiqa, i hlawhtlinna kan lo thlir chhunzawm zel ang," an ti.

Kumin May khan Atiqa hian Greece-a Champions of the Future Academy, Round 2-ah a che ṭha hle a, Greece series chanchina qualifying, heats leh finals zawng zawng hnehna chang vek thei pathumna a ni.

August thla tir lam khan Sweden-a FIA European Championship round-ah, Indian zinga top 10 thleng thei naupang ber a lo ni tawh bawk. Thla hmasaah khan Italy-a Champions of the Future Academy series, Round 3-ah Mercedes junior Niccolo Perico khumin pole position a chang a, mipui ngaihven a hlawh hle.

Atiqa chet dan hi FIA pawhin an hmuh hmaih lo a, "Italy-a Champions of the Future Academy Program-ah khan India atanga kum 11 mi Atiqa Mir chuan ṭhatzia lantirin pole position a chang a, khawvel huapa inelna sang takah event record thar a siam a ni," an ti.