Monza-in Dele Alli an duh

English midfielder Dele Alli chu Serie A club Monza chuan lak luh tumin an dawr a, Italian club hian Alli hi kum khat daih contract ziahpui an tum niin Italian chanchinbute chuan an ziak.

Kum 30 mi Alli hi Tottenham Hotspur tan a khelh laiin rawlthar beiseiawm ber a ni a, January 2022-a Spurs a chhuahsan hnuah ngai a awh leh tawh lo. Alli hian Everton a pan a, Toffees tan kum hnih a khel hnuah December 2024 khan a contract a tawp avangin a chhuak.

Everton a chhuahsan hnuah club nei loa a awm hnuah nikum January khan Como a zawm, Italian club tan hian thla 18 châm turin contract a ziak a, Cesc Fabregas-a hnuaiah a career siam ṭhat leh a tum.

Mahse Como-ah beisei a pha lo a, minute kua chiah a inlan hman a, a inkhelh chhunah hian red card a hmu bawk. Nikum September thla khan club nen inhriatthiam tawnnain a contract an titawp a, tun thlengin club a la nei leh lo.

Kum khat dawn club nei loa a awm hnuah Monza an lo lang a, Serie A kai thar hian Spurs midfielder hlui hi lak luh an duh a, mahse Alli chuan Italian club hi a zawm dawn em tih a chiang lo.

Alli hian 2023 khan Gary Neville nen an inkawmnaah harsatna a tawh thu a sawi a, a rilru lamah buaina a neih avangin mutthilhna damdawi ngawl a vei thu sawiin Spurs-a a hun tawp lamah inkhelh chawlhsan a tum hman thu a sawi bawk.

Monza hian Spurs midfielder hlui hi an chang thei a nih pawhin rinrawl a nih a rinawm lo a, mahse a tawnhriat ngah tak a nih avangin club-in an hmang ṭangkai thei ang.