Roma tan Malen a vul

AS Roma chuan Thawhṭanni zan khan season thar atana an league match hmasa berah, Fiorentina chu 4-0 in an sawp a, Donyell Malen chuan hattrick siamin Niccolo Pisilli chuan goal khat a khung bawk.

Kum 27 mi Malen-a goal khung zawng zawng hi Paulo Dybala siamsak vek a ni a, Dutch forward a chet ṭhat tluk zetin Dybala a khel ṭha. Argentine forward hi a vanneih zan ni se goal khung ve thei tur a ni.

Netherlands international Malen hian thlasik transfer lai khan, Aston Villa aṭangin Roma hi loan-in a lo khel tawh. A chet ṭhat avangin euro maktaduai 25 sengin a nghetin an la lut a, tun season-ah Roma rinrawl a ni dawn.

Hetihlai hian tun nipui transfer-a chhuak tur anga sawi Dybala a hmuhnawm a, an team khaipa ber a ni. Kum 32 mi Dybala hi Malen nen an inman nghal a, an dam ṭha a nih phawt chuan Serie A hmatawng hlauhawm per pawl an ni thei ang.

Thawhṭanni zan vek khan Lazio chuan an player thar, Davide Frattesi goal hmangin Bologna chu 1-0 in an hneh ve bawk a, Inter Milan aṭanga an hawh Italian midfielder hi Lazio tan a che ṭha nghal hle.