UEFA-in Man City an hrem na

Europe-a football thuneitu sang ber UEFA chuan Manchester City chu 'club licensing and financial fair play' dan an zawm loh avangin season hnih chhung an hnuaia inelna hmachhawn thei lo turin an hrem. Premier League champion lai hi euro maktaduai 30 (£25m) chawi tura tih an ni bawk.

English club hi infiamna lama thuneitu sang 'Court of Arbitration for Sport' lamah an la zualko thei a, Manchester City hian an chungchang hi CAS ngaihtuah nawntir ngei an tum thu an sawi.

Club Financial Control Body (CFCB) hnuaia ding Adjudicatory Chamber chuan, "Kum 2012-2016 chhunga sponsorshi aṭanga an sum hmuh an account inziah dan leh UEFA hnenah an sum chetvel dan a dik loin an thehlut," tiin Man City dan bawhchhiat dan an sawi a, English club-in an chhui zuinaah an thlawp ṭha lo tih an sawi bawk.

UEFA hremna bakah Man City hi Premier League-a an point hmuh paih theih dan a awm a, a chhan chu UEFA hnuaia Financial Fair Play leh league lama FFP dan hi a inzul vang a ni. City hmeichhe team erawhin hremna an hmachhawn lo ang.

Man City erawhin UEFA chu tum nei saa an chungchang chhui zuiah an puh a, an thutlukna siam danah an lungawi lo hle. English club chuan, "December 2018 khan UEFA chief investigator chuan an chhui hauh hmain Manchester City hrem theih dan a thlir lawk tawh a, an chhui na put ru a awm chhoh reng danah an hremna lek kawh dan hi mak kan ti lo. He buaina hi UEFA bul ṭan, UEFA chhui zui leh UEFA thutlukna siam a ni a, he thutlukna dik lo tak hi a rang thei ang berin CAS-ah kan zualko pui ang," tiin thuchhuah an siam.

La Liga president Javier Tebas erawhin, "UEFA-in financial fair play dan an siam a, dan bawhchhetu an hrem hi football hmalam hun zel atan a ṭha a ni. Kum tam tak chhung Manchester City leh Paris St-Germain te chet danah hremna la turin kan ngen tawh a, tuna an hrem ta hi a lawmawm," tiin UEFA lamah an 

ṭang thung.