MLS daltu goal kham leh goal ban

Star Cement MPL13-ah MLS FC-in Thawhlehni zan khan MPL kaithar Ramthar Veng FC an hmachhawn a, goal hmuh tur a awm lo. Lawngtlai club MLS-in chak theihna hun ṭha an nei a, goal kham vawi hnih an pet ber bakah goal ban vawi hnih an pet per.

Coach F. Lalrozama enkawl MLS-in bul an ṭan ṭha a, Aizawl FC aṭanga an lakluh Felix Lalruatsanga'n crossbar a pet per nghal a, hemi per hi Falton N. Beirachakhei-a'n changin goal kham bawk a pet per. MLS-in first half-ah ṭum hnih crossbar an pet per a, Ramthar Vengin Malsawmzuala leh MS Dawngliana te kawl mah se an che thei lo.

Second half-ah MLS bawk an che ṭha a, Serchhip tlangval Felix-a'n goal ban kawh zetin a pet per a, hemi per let hi Falton-a'n goal-ah a chantir thei lo. Serkawr tlangval Falton hian ṭha zeta a lakluh hnuah goal-ah a chantir thei lo bawk.

First half-ah goal khamin MLS goal khungtu tur ṭum hnih a dang a, second half-ah goal banin ṭum hnih bawk a dang. Manipur forward Abdul Wahid-a'n goal ban a pet per leh a, Wahid hi coach Rozama'n Rajasthan United a enkawl laia a player hlui a ni a, MLS-a khel turin a lalut.

Ramthar an ṭang tluan a, tlarhnunga ban rinawm Joshua Vanlalrinliana Ngente chu player of the match-ah an thlang. HC Zarzoliana hote hian August 28, Zirtawpni tlai dar 3:00-ah Saikhamakawn FC an hmachhawn ang.