Dinthar hnehtu Police

Star Cement MPL13-ah Mizoram Police-in chakin bul an ṭan a, Lalbiaksanga Colney enkawl team hian Dinthar FC 1-0 in an hneh. Goal awmchhun hi Isaak Malsawmkima'n penalty aṭangin a khung.

Police tan result ṭha bik a ni a, an elpui Dinthar an hneh avangin result duhthusam a ni. Nimin inkhelah team pahnih an intluk tawk a, Police chakna kawngah F. Lallawmkima a pawimawh hle.

Lawma hian MPL10-ah khan Police a champion pui a, record ṭha tak neihpui mah se nikuma Mizoram Police-in recruitment an neih khan a ngheta lak a nilo. Season liam ta khan Kanan FC tan a khel a, kuminah Police team-in an la let.

Dinthar lakah Lawma hian penalty a hlawh chhuak a, 'cool' takin minute 39-naah Kolasib tlangval Isaka'n Police chakna goal a khung. Coach BS-a kaihhruai team tlarhnung a phui ṭha a, 1-0 in an chak.