Delap-a manah Chelsea leh Forest inrem

Nottingham Forest chuan an club player man to ber ni turin Liam Delap an la lut dawn a, Chelsea striker manah hian pound maktaduai 50 an theh chhuak ang - tun karah medical a nei ang a, a paltlang chuan contract a ziak zui ang.

Kum 23 mi Delap hian season hmasa ṭan dawn khan Ipswich Town aṭangin Chelsea hi a zawm a, khatihlaia a man zat kha £30mtd niin, Manchester United leh Everton pawhin ngaihven mah se, Chelsea pan a thlang.

Mahse, Delap hian Blues-ah beisei a phak lo. Season hman zawh takah khan inelna hrang hrangah match 41 khelin goal hnih a khung a, striker goal khung zat atan chuan a tlem hle.

Hetihrual hian Delap hian season liam taah khan a malpui leh darah hliam a nei a, chu chuan a khelh danah nghawng a nei ve bawk - a kum a la naupan avangin Forest pawh hian an ngam huai niin a lang.

Forest hian Sporting Lisbon aṭangin defender Ousmane Diomande chu £34mtd-in an lei a, free agent pahnih, Austrian midfielder Xaver Schlager leh goalkeeper Steve Benda te an la lut tawh bawk a, Delap-a'n a zawm ve leh dawn ta.

Hetihlai hian Forest hian midfielder Elliot Anderson chu an club player hralh tawh zinga man to ber ni turin, Manchester City hnenah £116mtd-in an hralh a, striker Taiwo Awoniyi chu Coventry City hnenah £9mtd-in an hralh bawk.

Delap hralhtu Chelsea hian an league match hmasa berah Fulham chu 3-2 in an hneh a, zanin dar 12:00-ah League Cup second round khelin Luton Town an mikhual ang.