Marmoush-a'n loan-in Spurs a zawm

Tottenham Hotspur an la in lei zo thei lo! Roberto de Zerbi enkawl team hian, Manchester City forward Omar Marmoush chu season khat chhung an hnena loan-a khel turin an la lut a, season khat hnuah a nghetin £60mtd-in an la lut thei ang.

Kum 27 mi Marmoush hian City aṭangin Eintracht Frankfurt chu £59mtd-in nikum January khan an la lut a, mahse, Erling Haaland-a thachhang dawltu niin, a theihna tak tak pholang turin hun a nei tam tawk lo.

Egypt international hian City tan inelna hrang hrangah match 62 khelin, goal 16 a khung a, assist vawi ruk a nei tel. Season hman zawh takah khan match 36 khelin goal riat a khung a, assist vawi thum a nei.

Mahse, match 36 zingah hian vawi 16 chiah inkhel bul a ṭan a, khelmuala minute 90 khelh tluan hi vawi thum chiah a nei! Tunah chuan chona thar hmachhawn turin, Savinho hnungzuiin Spurs a zawm ta.

Tottenham hian tun nipuiah West Ham aṭangin Mateus Fernandes (£85mtd), Newcastle United aṭangin Sandro Tonali (£100mtd) leh Brighton & Hove Albion aṭangin Jan Paul van Hecke (£52mtd) an la lut tawh a, defender pahnih Marcos Senesi, Andy Robertson leh goalkeeper Martin Dubravka te chu free transfer-in an la bawk.

City-a Marmoush-a khelhpui Savinho chu £85mtd thlenga a man sang chho thei turin an la lut bawk a, an che na rem rem hle. Mahse, an league match hmasa berah Brentford chu 3-0 in an ngam lo a, nizan khan Charlton Athletic nen League Cup second round-ah inkhelin, an result kan hre hman lo.