Pathian vang chauh a ni - Remsiami

Mizo nula Lalremsiami'n India rama infiammi chawimawina sang, Arjuna Award a dawng dawn a, Mizo zinga he award dawng hmasa ber tur a ni dawn.

India tana Hockey World Cup khel feh chhuak mek Siami chuan, Arjuna Award a dawng tur chu Pathian vang liau liau a nih thu Vanglaini a hrilh.

Siami chuan, "Award ka dawng dawn tih ka hriat khan, ka rilrua lo awm hmasa ber chu Pathian a ni a, Pathian vang chauh a ni tih ka hria a, ka lawm em em a ni," a ti.

Kolasib nula chuan, Arjuna Award dawn chu a rilruah a lo awm tawh ṭhin thu a sawi. Siami chuan, "Ka lawmin ka phur takzet. Dawn hi chu ka lo beisei ve tawh ṭhin a, tun hun hi ka tana Pathian ruat a nih ka ring," tiin Vanglaini a hrilh.

Siami hi India tan hmeichhe Hockey World Cup khelin a feh chhuak a, mahse, India hi semifinal a thlenpui zo ta lo - India squad-ah hian Siami bakah Kanghmun South nula Lalthantluangi a tel bawk.

Mizo nula pahnih telna India hian zanin dar 6:30-ah an match hnuhnung ber khelin, Germany an hmachhawn ang a, pangana nih an inchuh ang.

India hian an group-ah China (2-2), South Africa (6-1) leh England (0-0) hmachhawnin, tlawm an nei lo a, second round an lut. Second round group-ah hian Netherlands, Australia leh China an awmpui.

Second round-ah hian Netherlands leh Australia hmachhawnin, Netherlands lakah 2-0 in an tlawm a, Australia hi 0-0 in an inhnehtawkpui - China erawh group stage-a an inhmachhawn tawhna chhiar a ni thung.

India hian second round group-ah hian Netherlands chiah an phak lo a, group-a a sang pahnih chu semifinal lut tur an ni. Netherlands chu hmahruaitu niin an tlang a, Australia nen an point hmuh zat inang mah se, Australia an tlang.

Group-ah hian point hmuh zat a inan chuan hnehna chan zat en tur a ni a, a la inan cheu chuan goal difference en tur a ni a, chumi zawhah goal khung zat en leh tur a ni - Australia hi India aia goal an khung tam zawk avang chauhin an tlang.

A tawpah chuan India-in pangana inchuha inkhel an hmachhawn a ṭul ta a, pangana an ni thei a nih chuan kum 1974 hnua India-in Hmeichhe Hockey World Cup-a an thlen san ber a ni dawn tho a ni.