League Cup: Leeds-in Forest an pet tla

Leeds United chuan Thawhlehni zan khan Nottingham Forest chu 2-0 in League Cup second round-ah an pet tla a, club pahnihte hi ni thum chhunga an vawi hnih intawnna niin Forest an chak zo lo ve ve a, Oliver Glasner-a tan result duhawm a ni lo.

Nottingham Forest-in goal an khung theih loh laiin Leeds-in goal hnih an khung a, Daniel James leh James Justin ten goal khat ve ve hmangin an team an chakpui.

Inkhel chu

City Ground, Nottingham-a inkhelah mualneitu-in chance an nei hmasa zawk a, Ola Aina shot chu Leeds keeper thar James Trafford-a'n a dansak. Hemi hnu hian Forest-in chance an nei chhunzawm thei lawk lo.

Whites (Leeds sawina) erawh an insiamṭha nghal a, Lukas Nmecha-a'n chance a nei nghal a, mahse goal-ah a chantir thei lo. Leeds pawhin first half-ah chance duhawm tia sawi tur dang an nei thei bik lo.

Second half-ah erawh Leeds an hmuhnawm nghal a, minute 50-naah Sean Longstaff-a ball bek ṭha tak chu James-a'n an hmahruaina goal atan a khung. Manchester United winger hlui James-a'n vengtu a nei lo a, amah vengtu Neco Williams-a'n a tihtur a hlen ṭha tawk lo.

Goal an chhuah hnuah Forest-in chance an nei ve nghal a, Chris Wood-a shot chu Trafford bawkin a dang a, Leeds-in counter attack aṭangin an nawr let nghal a, Noah Okafor-a'n goal zawnah a pet lo hlauh.

Minute 75-naah Justin-a'n buai nuai nuai karah hnai tak aṭangin a pet goal a, English defender goal hi an chak nemnghehna a ni zui. Forest erawhin hun tawp thlenga goal an khung theih loh avangin an tlawm a, inelna aṭanga pet chhuah an ni.

Glasner a derthawng?

Forest manager Glasner chuan, "Inkhel harsa tak a ni a, a tlawm zawkah kan ṭan avangin a hrehawm duh hle. Ni thum chhung lekin Leeds lakah inkhel pahnihah a zawnin kan tlawm a, an ṭha zawk a ni tih kan pawm a ngai.

Tihsual kan ngah mah mah a, thutlukna dik lo kan siam hnem bawk. Leeds an khelh ṭhat rualin hun ṭha kan pe hnem a, pre season-a kan khelh dan nen chuan a inthlau hle a ni," a ti.

Kum 51 mi Glasner-a nauten an khingpuite an nawrin a aia nain an innawr let tir zel a, Leeds hmatawngte ven lohin an dah reng bawk a, an defence a phui lo takzet. Pound maktaduai 34 senga an lak luh Ousmane Diomande a vawi khat nan a inlan a, a khel ṭha tawk lo hle.

Season tharah match hnih chauh la khel mah se, an tum tawk tur taka ngaih Leeds lakah a zawnin vawi hnih an tlawm a, an manager thar Glasner-a'n season tluan a daih ang em tih chu zawhna a ni leh der tawh. Forest-in an manager te ban an awlsam dan ngaihtuahin zawhna awm tak a ni.

Forest-in insiamṭhat an mamawh takzet a, an khelh dan enin season hmasaa manager an ban hnem leh relegation battle an hmachhawn leh mai theihna chance a awm. Insiamṭhat an mamawh lai takin August 29, Inrinni tlai dar 5:00 hian Liverpool an la hmachhawn dawn zui!