Referee chungah Besiktas an lawm lo

Turkish club Besiktas chuan August 24, Thawhṭanni zana Turkish Super Lig match-a Alanyaspor nen an inkhelh ṭuma referee thutluknaah an lawm lo a, ram chhunga referee te tan mualphona a nih thu an sawi.

Thawhṭanni zan inkhelah hian minute riatna lekah Besiktas forward thar, Leandro Trossard chu Alanyaspor defender Fidan Aliti-a'n a hmaiah a beng a, red card beisei mah se match referee Adnan Deniz Kayatepe-a'n a ham loh bakah VAR a inrawlh lo bawk.

Hemi hnu lawk hian Besiktas-in goal an khung chu pawm a ni lo a, goal khungtu Oh Hyeon-gyu chu foul pek a ni zawk. He inkhelah hian Besiktas hi 1-0 a an chak loh bawk avangin an lawm lo hle.

Arsenal forward hlui Leandro Trossard chuan, "Kha thutlukna kha chu thlak ngei tur a ni a, ka hmaiah chiang taka min ben avangin red card hmu ngei tur a ni. Video en let leh pawhin a chiang," a ti a, a thinrim takzet.

Besiktas pawhin thuchhuah an siamin, "Alanyaspor kan hmachhawn ṭuma referee-te thutlukna siam hi Turkey referee-te tan chuan mualphona a ni reng tawh ang.

'Central Referee Committee'-a hotu ber, nikum lawka Turkish Cup semifinal-a thutlukna dik lo tak siamtu Adnan Deniz Kayatepe bawk kha tunah a inlar leh ta.

Aliti-a'n Trossard-a ben lai kha a hmu lo a nih pawhin, VAR-a mawhphurhna latu Bülent Birincioglu tal kha chu ngawi reng tur a ni lo. Foul a ham vanga kan goal khung a pawm loh dan khan a fimkhur tawk lo tih a hriat theih bawk.

Second half-a Dusan Vlahovic nghawnga an pawh te kha an hmu leh miah lo bawk a, Kayatepe leh Birincioglu te hi kan inkhel min enkawl turin kan duh tawh lo a ni. Duhsakna bik nih kan duh vang a ni lo, mahse thutlukna dik leh 'fair' taka rorel kan phut a ni. Hetiang thil dik lo thleng hi chu a tawp thlengin kan bei zel ang," an ti.

Zanin dar 10:30-ah Besiktas hian Kauno Zalgiris nen Europa League playoff second leg an khel dawn a, first leg-ah 3-0 a an chak tawh avangin hahdam takin an khelh a rinawm.