Zanin dar 7-ah Chanmari Vs Mizoram Police

Star Cement MPL13-ah champion lai Chanmari FC-in champion zia an chhuah nghal a, Mizoram Police pawhin team ṭha zia chhuahin chakin bul an ṭan ve bawk. Mizo team ṭha pahnih hi zanin dar 7:00 hian RG Stadium-ah an inhmachhawn dawn a, Chanmari fiahna ni loin Police fiahna a tih theih ang.

Tun hma chuan Mizo club ṭha tehna chu Mizoram Police an ni ṭhin a, Police nena inkhel tawk team chu team ṭhaah chhiar an ni. Tunah erawh a danglam tawh a, Chanmari FC hi tehfung atana hman theih an ni tawh zawk. Chanmarians hian Indian Football League an khel a, Mizo player ṭha an lakluh bawk avangin champion nawn turin an ṭha tawk.

Coach Rochhingpuia kaihhruai Chanmari hian match hmasa berah Kanan FC 5-1 in an sawp a, Aron Vanlalrinchhana'n hattrick a siam bakah Lalruatsanga leh Suanngaihmuana ten goal khat ve ve an khung. Kanan an hmachhawn ṭum hian tlarhnungah defender thar F. Lalchhanchhuaha pawhin bul a ṭan a, bench lamah player ṭha an awm nual bawk.

Police lamin civil player naupang zawk an lalut nual a, theihna nei sang zingah F. Lallawmkima chang thei bawk mah se player ṭha ber an lalut thei bik lo. Chutihrualin goalkeeper-ah F. Lalmuanawma a awm thei a, tlarhnungah Lalhmunmawia leh Lalrinzuala Khiangte ten an la ho thei bakah midfield-ah Lalbiakthanga Hmar te an la awm a, captain Lalbiakhlua'n (Biaktea) tlarhma a la puih bawk avangin zuam ngawt a rem lo ang. MPL10 final-ah pawh Police-in Chanmari hi an barakhaih tawh a, zaninah barakhaih nawn an tum ang.