Liverpool-in Barcola la lut dawn

Premier League match hmasa bera chak zo lo Liverpool chuan nipui transfer-ah tlarhma player neih belh ngei an tum a, rei tak an lo dawr tawh Bradley Barcola chu an la lut hnai–he thuziak i chhiar meuh chuan an la lut fel tawh hial mai thei.

Kum 23 mi forward hi Paris St-Germain chuan pound maktaduai 145 an chhiar a, mahse, Liverpool hian £100mtd bawr vela lei chhuah theih an inbeisei thung. Thuthar berah chuan Reds leh PSG hi £120mtd bawrin an inrem dawn.

Liverpool hian £100mtd an pe phawt ang a, a khelh ṭhat dan a zira pek belh turin £20mtd hi chu ruahman a ni ang. Barcola hian a ke dinglam a hmang thiam zawk a, mahse, mual vei lam sira khelh nuam a ti thung!

Reds hian Barcola an la lut a nih chuan Cody Gakpo hma hun a chiang lo sawt ang em, tih chu zawhna awm mek a ni. Dutch forward hian an league match hmasa berah Liverpool tan goal a khung a, goal class bik a ni–coach Andoni Iraola chuan Gakpo hi chhuak lo turin a duh, niin an sawi.

Hetihlai hian Reds hian Gambia winger, Brighton & Hove Albion tana khel mek, Yankuba Minteh chu lakluh tumin an ngaihven bawk a, mahse, vawi hnih ngawt £50mtd leh £60mtd-in an dawr tawh a, Brighton hian an hnar ve ve.

Reds hian Crystal Palace forward Ismaila Sarr an ngaihven mek bawk a, ani erawh Minteh an dawrna hnar a nih avanga ngaihven zui niin a lang. Hetihlai hian Palace chuan an player hi zawrh lai a nih loh thu an sawi.