Villa-ah Jackson a lut hnai

Europa League champion Aston Villa chuan Chelsea aṭangin striker Nicolas Jackson an la lut dawn a, Senegalese striker hi an la lut a nih chuan pound maktaduai 65 bawr vel an seng tura ngaih a ni.

Villa hian an striker chhuanvawr Ollie Watkins chu chelh duh mah se, English striker hian hlawh tam zawk hlawh duhin, Saudi Pro League club Al Hilal zawm a duh nia sawi a ni a, a thlakna turin Jackson an la lut dawn.

Unai Emery enkawl Villa hian £65mtd hi an pe tla nghal dawn lo a, £47.5mtd an pe phawt ang a, Senegalese striker khelh ṭhat dan a zirin £17.5mtd an pek belh ang.

Villa hian Watkins hi £51mtd-in an hralh dawn thung a, Jackson an lakluhna sum hmasa chu a 'cover' phak zan dawn tihna a ni–kum 30 mi Watkins hian Villa hi kum 2020 khan Brentford aṭangin a zawm a, Villa tana top flight league-a goal khung hnem ber niin, goal 108 a khung.

Jackson leh Villa hi mimal thilah an la inrem lo a, hlawh chungchanga an inrem theih hunah Villa Park lamah a puanthuah a tel nghal ang. Kum 25 mi striker hi Unai Emery nen Villarreal-ah an lo thawk dun tawh a, a club tharah a mikhual dawn lo.

Jackson hian Villarreal aṭang hian Chelsea hi kum 2023 khan a zawm a, £35mtd man niin, match 81 a inlansakah goal 30 a khung a, season hmasa kha Bayern Munich-ah loan-in a khel. German club tan hian match 34-ah goal 11 khungin, Bundesliga nomawi a chawi.

Villa hian tun nipui transfer-ah Johan Manzambi, midfielder Joao Gomes, goalkeeper Zion Suzuki leh defender Matteo Ruggeri te an la lut tawh a, an league match hmasa berah Brighton & Hove Albion chu 4-0 ngawtin an ngam lo.