Chelsea-in Emi Martinez ngaihven

Premier League-a an match hmasa bera goal thum khung a, goal hnih chhuahtu Chelsea chuan tlarhnung thuam ṭhat dan an ngaihtuah mek a, Aston Villa goalkeeper Emiliano Martinez chu lakluh tumin a aiawhte nen an indawr mek.

Kum 33 mi keeper hi Juventus pawhin lakluh tumin an lo dawr tawh a, mahse, a kut zungṭang hliam vangin Italian club hian an dawr zui lo–Tottenham Hotspur goalkeeper Guglielmo Vicario an la lut ta daih.

Mahse, Villa hian Martinez hi chhuak turah ngaiin keeper dang an lo melh hman tawh a, Parma aṭangin Japanese goalkeeper Zion Suzuki chu pound maktaduai 30-in an la lut tawh.

Hei vang hian Martinez tan club thar zawn a ngai a, keeper thar mamawh Chelsea-in an ngaihven. Blues-ah hian Robert Sanchez chu number 1 a ni mek a, mahse, Fulham laka 3-2 a an chak ṭumin, goal hnih chu a chetsual vanga lut ve ve a ni.

Blues hian Villa ten tun nipuiah indawrna an nei nual tawh. Chelsea hian Villa aṭangin Morgan Rogers chu £117mtd-in an la lut tawh a, Alejandro Garnacho chuan loan-in Villa a pan thung.

Nicolas Jackson-a'n £65mtd-in Villa a pan hnai a, Martinez hian Stamford Bridge lam a pan ve leh thung a nih pawhin a mak lo ang.