Delap-a'n Forest a zawm ta

Chelsea striker Liam Delap chuan Nottingham Forest chu pound maktaduai 50-in an zawm ta a, Forest player man to ber a ni nghal–City Ground-ah kum nga chhung khel turin contract a ziak.

Delap chuan, "Forest hi club lian leh sulhnu pawh ropui tak nei a ni a, manager Oliver Glasner nen pawh kan inbia a, a team enkawl dan hian min hneh hle.

"A enkawlna hnuaiah hma sawn a, sang tak thlen theih ka inbeisei a, goal tam tak ka khung theih ka beisei bawk. Team kan nihna angin thil ropui tak kan tih ho a, Premier League top club ni tura theihtawp kan chhuah tlan theih ka beisei," a ti.

Kum 23 mi Delap hian season hmasa khan Ipswich Town chhuahsanin Chelsea a pan a, a man zat hi £30mtd niin, Chelsea hian kum khat chhung lekin £20mtd an hlep tihna a ni–season hman zawh takah khan inelna hrang hrangah match 41 khelin goal hnih a khung.

Delap-a goal khung zat ngaihtuahin, Forest-in heti zata an ngam hi a mak ang reng hle. Mahse, Delap hi Manchester City academy-ah pawh a inzir ṭhin a, striker hmabak nei êng tak niin, Forest hian la fuh an la inti viau mai thei!