Rodri thlaktu tur Bouaddi-a'n City a zawm ta

Manchester City chuan midfielder Ayyoub Bouaddi chu Lille aṭangin an la lut ta a, kum 18 mi player manah hian pound maktaduai 85.6 an inseng–Premier League-a kum 20 tling lo player man to ber a ni nghal.

Morocco international hian Etihad Stadium-ah kum nga chhung atan contract a ziak nghal a, City hian a man hi an pe tla nghal vek dawn lo. £81.4mtd an pe phawt ang a, a khelh ṭhat dan a zirin £4.2mtd pek belh tur a ni ang.

World Cup-a hming chher tak Bouaddi chuan, "Kei leh ka chhungte tan ni duhawm bik a ni. Ka tan chuan Manchester City hi khawvela club ṭha ber a ni a, he club zawm a, 'City player ka ni' ka inti thei tur hi ka lawm hle," a ti.

Rodri thlakna?

Manchester City hian tun nipui transfer-ah an player langsar an chhuahtir nual a, chung zingah chuan Ballon d'Or la thei, Spain captain Rodri pawh a tel–ani hian Barcelona chu £65mtd-in a zawm.

City hian Kevin de Bruyne thlana tura an lakluh Tijjani Reinders pawh season khat chauh an kawl hman tihin, Saudi Pro League club Al Qadsiah-ah £52mtd-in an hralh bawk.

Club captain Bernardo Silva pawhin contract thar ziak loin, Real Madrid chu free transfer-in a zawm a, Nico Gonzalez chu Newcastle United hnenah £52mtd-in an hralh bawk–midfield ringawt pawh inthuam chak an mamawh hle.

Champion team

Kum 18 mi Bouaddi tan City player chhuak tate hmun ruak hnawhkhah a harsa ang tih a chiang a, hmabak a ko nghal hle. Mahse, Lille tana hming chher tak midfielder hi EPL khel turin a phur hle.

Bouaddi chuan, "Ka theihna sang ber thleng a, a tawp ka thlen theih nan, ni tin theihtawp ka chhuah ṭhin. City inkhel hi ka en fo a, an khelh danin ka mit a la ṭhin hle.

"Game mawi tak chhawpchhuah hi an tum reng ṭhin ni maiin ka hria. Chu mai a ni lo–chak an duh tih an pholang ṭhin a, he club hi chu nomawi chawi tur renga duan ni awm renga mawi a ni," a ti a, a club thar a fak.

Beiseina

France tana age level hrang hranga inlan Bouaddi hian Les Bleus senior team-ah pawh hmun a la chang thuai ang tih a chian laiin, a pianna hmun aiin thisen a ngai pawimawh zawk a, senior team-ah Morocco tan a inlan daih!

France Under-21 captain hlui hian Morocco tan match riat a khel der tawh a, Lille aṭanga inzir chhuak niin, club dang tan a la khel ngai lo–Lille tan match 96 a khel hman a, goal khung loin, assist vawi li a nei.

City hian midfield thuam chak ngei tumin, theihtawp chhuahin hma an la mek a, Bouaddi hma hian Nottingham Forest aṭangin midfielder Elliot Anderson chu £116mtd-in an la lut tawh a, Chelsea-in £120mtd an chhiar Enzo Fernandez pawh lakluh an la tum.

Hmabak chu

Manchester City hian season 10 hnuah a vawi khat nan, Pep Guardiola tel loin season an hmachhawn a, Spanish coach chhuak ta thlak nan hian, a assistant hlui Enzo Maresca an la lut.

Chelsea coach hlui ni bawk Maresca hnuaia an match hmasa berah City chak nghal mah se, Bournemouth lakah 2-1 a chak turin vanneihna an mamawh a, hun pek belhah Joško Gvardiol-a'n chakna goal a khung.

City hian zanin dar 12:30-ah an league match hnihna an khel dawn a, Crystal Palace chu khualmualah an lenchilh dawn–player thar Bouaddi tan inkhel nghal turin a la hma hret ang.