Real chakna Mbappe hattrick

Nilaini zan La Liga inkhelah Real Madrid chuan 4-0 in Real Sociedad an hneh a, an match hmasa bera Espanyol an hneh hram hnuah Jose Mourinho naute an insiamṭha nghal.

Los Blancos tan Kylian Mbappe-a'n Hattrick a siam a, Vinicius Junior chuan goal khat a thawh ve bawk. Sociedad tan Luka Sucic-a goal khung chu an mualpho lutuk tur hliahkhuhtu chauh a ni.

Inkhel chu

Santiago Bernabeu-a inkhelah Mbappe a hlauhawm nghal a, kum 27 mi forward hian minute rukna lekah chance nei nghal mah se Álex Remiro enchinna chauh a ni.

Mahse Mbappe a nil reng lo a, minute 40-naah Federico Valverde ball pek chu ṭha taka a lak hnuah chiang zetin an hmahruaina goal a khung. Real hlim chhung a rei lo thung a, minute li hnu lawkah Sucic-a'n an siphurh a sut ve nghal a, 1-1 in chawlhlawk an hmang.

Mbappe nge nge

Second half-ah erawh Real an chungnung zawk a, minte 60-naah Mbappe, Valverde leh Jude Bellingham ten Sociedad tlarhnung an ṭhiah hnuah French forward bawkin mawi takin a hmawr a bawk a, a team hma a hruai nawnpui.

Real an phur laklawh a, minute riat hnu lawkah kum 23 mi Bellingham-a thawhrah sengin Vini Jr-in goal ruakah a pet lut a, an hmahruaina a belhchhah.

Mbappe-a'n a lungthu kim nan minute 80-naah goal a khung leh a, an chak nemnghehna goal a ni zui. Goal khung tura a che vel chuan forward ṭha bik a nih zia a lantir a, Paris Saint-Germain forward hlui tan a career-a hattrick vawi 25 a siamna chiah a ni bawk.

Engtin zel?

Inkhelh banah Portuguese coach Mourinho chuan, "Mbappe hi player ṭha bik a ni a, World Cup-a a chet danin a tihchian bakah hriat reng tawh tur a ni. Real tan pawh chak duhin a tuihal a, team tana player ṭangkai tak niin goal khungtu satliah a ni lo.

Match tinah kan chak theih nan a thawh hlawk ber zinga mi a ni ziah a, ani ang player ṭha enkawl chuan mimal taka inhrawn a ngai lo. Kan tih tur chu team hi inlungrual taka kan awm theihna tura hnathawh a ni," a ti.

An match hmasa bera Espanyol nen an inkhel nen khaikhinin Real-in hma an sawn tih a hmuh theih a, player te an inman hle. Mahse defence a la phui tawk lo tih erawh hai rual a ni lo a, Mourinho-a'n siam ṭhat tur a la ngah.

Season tharah match hnih chauh la khel mah se Mbappe hi top scorer a nih leh ringtu an tam nghal a, Sociedad laka a khelh dan enin thil awm lo a ni lo. Real hian August 30, Pathianni zan dar 8:30-ah Malaga nen an inhmachhawn leh nghal dawn a, French forward hian en bik a hlawh leh ang.