Fenerbahce tlin zanah buaina a chhuak

Turkish club Fenerbahce chuan Nilaini zan khan, Champions League playoff second leg-ah Olympique Lyon chu 2-1 in an hneh a, first leg-ah 1-1 a an inhnehtawk tawh avangin aggregate-ah Turkish club hi 3-2 a chakin Champions League khel turin an inpet tling.

Fenerbahce tan Vedat Muriqi leh Archie Brown te chuan goal an khung a, Lyon tan Malick Fofana goal khung chu scoreline timawitu chauh a ni. Inkhelh zawh hnua sawi zui hlawh ber erawh buaina chhuak chu a ni a, boruak a sang hle.

Groupama Stadium, Lyon-a inkhelah Fenerbahce-in goal an khung hmasa zawk a, minute 23-naah kum 32 mi Muriqi-a'n an hmahruaina goal hmangin bul a ṭan. Minute li hnu lawkah Brown chuan belhchhahin a khung ve bawk.

Minute 61-naah Lyon tan Fofana-a'n an siphurh a sut ṭhen a, French club hian inkhel thunun zawk mah se goal dang an khung theih loh avangin a tlawm zawkah an ṭang a, UCL khel turin an tling zo lo.

Inkhelh zawh rualin Fenerbahce midfielder Matteo Guendouzi chuan Lyon fans hmaah ngeiawm takin an chak a lawm a, a teammate te leh Lyon player ten khap mah se a tawp chuang lo.

'Tunnel' a luh dawnah Lyon fan pakhat tlan lutin French midfielder chu khawih a tum a, security, player leh coaching staff te inrawlh ve nghal vatin 'tunnel' chhungah an innawr buai nasa hle.

Lyon fans ṭhenkhat thinrim chu tlan luh an tum ve nghal a, mahse security ten lo dang thei hlauhin buaina tam zawk an pumpelh.

Kum 27 mi Guendouzi chuan, "Inkhel kan ṭan hma aṭang tawhin Lyon ṭantute khan ka chhungte hming lamin zah lo takin min au nawmnah a, inkhelh zawh hnua khatianga ka 'celebrate' thei lo a nih chuan thil dik lo a ni zawkah ka ngai," a ti.

Yellow Canaries (Fenerbahce sawina) head coach Ismail Kartal chuan, "Kan team chuan Guendouzi kan thlawp a, a lamah kan ṭang reng ang. Chu chu team-in an tihtur pawh a ni," a ti ve bawk.