Kane-a'n PSG an champion leh a ring

Bayern Munich forward Harry Kane chuan season thar Champions League-ah, champion lai Paris Saint-Germain bawk chu champion tura a beisei san ber thu a sawi a, Kane hian PSG a dah sang hle.

Kum 33 mi Kane chuan, "Club lian tam tak Bayern, Arsenal, Real Madrid, Barcelona te awm mah se PSG bawk hi an champion leh ka ring a, a zawna kum hnih an champion tawh an nih avang hian a vawi thumna pawh an theih leh mai ka ring," a ti.

Season hmasa khan Bayern leh PSG hi semifinal-ah an lo intawng tawh a, first leg-ah inkhel hmuhnawm bik chhawp chhuakin 4-4 in an inhnehtawk. Second leg-ah erawh Luis Enrique naute 2-1 in an vannei zawk a, aggregate-ah 6-5 in an chak. He inkhelah hian English forward hian goal khat ve ve a khung.

PSG hian final-ah Arsenal hmachhawnin an champion zui a, 2017 hnua Real hnua a zawna UCL Champion leh hmasa ber an ni. Hmatawng neih ṭhat vanga lar PSG hian Mikel Godts leh Ferran Torres te an lak belh leh tawh a, sang tak an thlen leh a rinawm.

Tottenham Hotspur forward hlui chuan sawi chhunzawmin, "Season hmasaah Europe-ah kan che chhe lo a, vanduai vang liau liauin PSG kan hneh lo. Mahse kan thawkrim a, hun kal tawh kan vangin kan indawm kun reng lo a, UCL nomawi chawi ngei kan tum," a ti

Kane hian PSG dah sang mah se vanduai nawn an tum tawh lo. UCL League round-ah Bayern leh PSG hian inhmachhawn theihna chance an nei a, an intawng leh a nih chuan boruak a san phah ang.

Hetihlai hian Kane hi Bavarians chuan thlun ngheh an tum mek a, amah ber pawhin Allianz Arena-a châm chhunzawm zel a hreh lo niin khawthlang chanchinbute chuan an sawi.

Zanin dar 12:00 hian Bundesliga khelh ṭan a ni leh tawh dawn a, champion lai Bayern hian Stuttgart an mikhual nghal dawn a, Kane-a'n bul a ṭan a rinawm. Bayern hian DFL Supercup-ah Borussia hnehin nomawi an chawi tawh a, inrintawkna an nei sang nghal sawt ang.