NBA All Star 2020 Gordon a vanduai, Jones a hmuhnawm

NBA All Star 2020-a mimal inelna Skills Challenge leh 3-Point Contest te a hmuhnawm a, a tawp bera dah Slam Dunk-in sawi zui a hlawh ber. Aaron Gordon leh Derrick Jones Jr ten final round-ah 'perfect 50' an la nei ve ve a, dunk off-ah 7ft 5in-a sang Boston Celtics rookie Tacko Fall zuan khumtu Gordon aiin kut vei lama 'Windmill Jam' rawn lantirtu Jones a vannei ta zawk.

Skills Challenge-ah Bam Adebayo (Miami) chu pakhatna a ni a, 3-Point Contest-ah Buddy Hield (Sacramento) chu pakhatna a ni ve bawk. Tukin zing dar 6:30 hian NBA All Star an nei dawn a, Team Giannis leh Team LeBron te an inkhel ang.

Slam Dunk Contest-ah 2016-a Zach LaVine leh Aaron Gordon te inbeihna kha a hmuhnawm ber zinga a sawi a ni a, a tawpah Gordon a vanduai. Kum 2020-ah Orlando Magic forward Gordon a rawn inlan leh a, Slam Dunk-ah kher chuan a ṭha tih lantirin first round-a vawi hnih an dunk-ah perfect 50 a nei ve ve.

Dwight Howard-a'n kum 2008-a pakhatna a nih theihna Superman magic lantir leh tum mah se kum 12 liam ta boruak a pha ta lo. Milwaukee star Pat Connaughton-a'n ṭum hnihnaah MVP nilai Giannis Antetokounmpo a zuan khum a, perfect 50 nei ve mah se Derrick Jones Jr aia dunk hmasa zawkah point khata hmu tlemin final round a lut pha lo.

Chicago-ah Gordon leh Jones ten hmuhnawm an lantir. Miami star Jones pawhin a zawnin vawi li perfect 50 a nei a, Gordon erawhin perfect 50 vawi nga a nei thung. Point aṭanga teh chuan Gordon-a'n a hmu sang zawk a, amaherawhchu a hmuh sanna hi first round a nih avangin a pawimawh tawh lo.

Derrick Jones Jr-a'n free throw line pelh hret aṭanga zuangin kut vei lamin 'Windmill Jam' a rawn lantir a, 'perfect 50' a ni ta lo - point 48 a hmu. Gordon-a'n chak ngei tumin Boston Celtics rookie Tacko Fall a ko chhuak a, 7ft 5in-a sang hi zuan khumin a dunk. Champion tur a chiangah an ngai a, amaherawhchu score an tarlang - point 47 chauh a hmu. Gordon ang thoin commenator leh MVP nilai Giannis te pawhin mak an ti. 

Kum 2016-a vanduai Gordon chuan, "Nomawi pahnih chawi thei turah ka inngai a, hetah hian ka duhtawk e. Ka hmachhawp chu 3-point contest-a champion a ni," tiin result pawm har a tih thu a sawi.

LeBron James pawhin Gordon hiṭawmpuiin, "An pahnih khan nomawi an phu ve ve. Mipui kha hmuhnawm an entir a ni," tiin final round lut pahnih a fak. Vannei ta zawk Jones chuan, "Tacko lu kha a ke khan a fuh avangin point 50 a phu lo a, 48 hmu turah ka ngai a, kan intum ṭha leh turah ka ngai," tiin a sawi ve bawk.

Gordon hian Dunk Contest-ah vawi riat perfect 50 vawi riat a nei tawh a, vawi hnih champion tawh Zach LaVine (7) leh Michael Jordan (6) te aiin ngah zawk mah se nomawi a la chawi ve lo.