Zanin dar 7:00-ah Aizawl West Derby

Mizoram football-a club hlun zinga mi Dinthar FC-in I Day Football-ah an veng ṭhenawm Kanan FC an hneh lo. Dinthar tan mualphona a ni a, chutihrualin Kanan tan erawh hawi san phahna tham a ni thung.

Zanin dar 7:00 hian RG Stadium-ah Dinthar leh Kanan FC an inkhel dawn a, Aizawl West Derby hi Star Cement MPL13 inkhel tingaihnawmtu a ni. Maimawms-in phuba lak an duh ang a, Kananin hneh nawn sak an tum dawn.

Season liam ta khan Kanan FC-in a vawi khat nan MPL an khel a, MPL-a Aizawl West Derby-ah Dinthar 2-1 in an chak. An vawi hnih inkhelhnaah erawh 3-3 in an inhnehtawk thung.

Kumin I Day Football-ah khan an inhmachhawn leh a, hun pangngaiah 1-1 an inhnehtawk hnuin penlaty shootout-ah Kanan 4-3 in an vannei ta zawk. Kanan right back Lalruatfela'n chakna goal a khung a, goal khung lawm nan kawr a rawn phelh a, Dinthar ṭantute tan hmuh a hrehawm dawn.

Hei chauh hi a ni lo a, Dinthar hian MPL match hmasa berah Mizoram Police an hneh lo. Maimawms hliamah Police-in chi an phul a, a tuartu tur chu Kanan an ni thei dawn. Chutihrualin Kanan pawh hi Chanmari lakah an mualpho a, Dinthar hi insiamṭhatna atan an hmang thei ang.