Mipui mit fukna tur Zomuana

Star Cement MPL13-ah top scorer tur inrinsiakna awm ta se, tualchhung football hrethiam pha chin chauhin an thlang a nih chuan Zomuansanga'n vote a hmu sang lawr lak ang. Khawbel tlangval Zomuana'n goal hnih nen bul a ṭan a, I Day Football top scorer hi vawiin tlai dar 3:00-a Aizawl FC leh Lawngtlai club MLS FC te inkhelh hunah en bik tur a ni ang.

Khawbel tlangval Zomuana hian season liam ta khan goal 18 a khung a, league round match 14-ah hrem vanga match 12 a khel chungin goal 16 a khung pha. League match vawi 12 a khelhah hian match khatah chauh goal khung loh a nei a, semifinal-ah first leg leh second leg-ah goal khat ve ve khung lehin final-ah erawh goal a khung lo.

Zomuana hian MPL record thar a siam a, season khatah goal 18 ngawt a khung. Khawbel tlangval hian goal a khung a ni ringawt lo a, Aizawl FC-in game mawi an khelh theih nan a ṭangkai hle. MLS pawh hian Zomuana goal khung theihzia an hre chiang ang.

Chutihrualin MLS hian Aizawl FC hi kumin I Day Football match hmasa berah an hmachhawn a, 2-2 in an inhnehtawk. Lawngtlai club hian 2-1 in hma an hruai zawk a, injury time-ah pawh minute riatnaah Rohmingthanga hmangin Aizawl FC-in an sut hram. I Day Football avang hian coach Lalrozama Fanai hoten AFC hi an ngam sawt dawn a, vawiin tlaiah inkhel hmuhnawm a beisei theih ang.