Arsenal-in Alvarez an chang mai thei!

Atletico Madrid chuan, "Barcelona-a a kalna chance chu 0% a ni e," tia Julian Alvarez chungchang an sawi hnuah, an striker hralh turin hma an la a, mahse, Catalan club hnenah ni loin, Arsenal hnenah hralh an tum!

Kum 26 mi Alvarez hian Barcelona pan a duh a, mahse, Madrid khaw club hian an elpui club hnenah an striker ṭha hi kaltir an duh lo. Club thuneitute chuan Alvarez hi a mimal tak pawhin an hmu tawh a, Barca hnena an hralh loh tur thu chiang takin an hrilh.

Hetiang boruak karah hian Alvarez hian ni hnih ngawt Atletico training a zawm duh tawh lo a, a damloh thu a sawi! Atletico pawhin striker hlim lo kawl reng an duh lo a, mahse, Barca-a kaltir erawh an tum chuang lo.

Atletico Madrid hi Arsenal nen an indawr mek a, kar hmasa khan club director Mateu Alemany chu London-ah zinin, Gunners aiawhte nen an inbia. Alemany hian an striker hi an hralh dawn a nih chuan pound maktaduai 128 an beisei thu a sawi a, Arsenal chuan an pawm niin an sawi.

Barcelona president Joan Laporte chuan tun hnai khan Alvarez an ngaihven thu a sawi a, Atletico Madrid chuan darkar 24 chhunga thuchhuah pahnih siam zuiin, an striker chu Barcelona hnena kaltir an tum loh thu an sawi.

Atletico Madrid chuan, "Barcelona-a a kalna chance chu 0% a ni e," an ti a, a hnuah thuchhuah dang siam lehin, "Atletico de Madrid board of director-te chuan, Barcelona-a Alvarez kaltir lo tura club thutlukna chu lungrual takin an pawm a ni," an ti a, Catalan club tan a beidawnthlak khawp ang.