Aston Villa-ah Goretzka a lut

Aston Villa chuan Bayern Munich midfielder Leon Goretzka chu free transfer-in an la lut a, Germany international hian tawnhriat a neih ṭhat avangin Villa tan chuan ani ang class free transfer-a lakluh theih hi a hlu hle.

Kum 31 mi midfielder chuan, "Chawlh ka hmang rei deuh a, chu chuan ka club duh lam pan tura thutlukna siam kawngah pawh min pui hle. Kan inbiak tirh aṭang khan ka hmin nghal viau a, Villa ka zawm thei hi ka lawm a ni," a ti.

Germany tan vawi 73 inlana goal 15 khungtu Goretzka chuan, "Coach Unai Emery nen kan inbiak tirh aṭang khan ka phur nghal viau a, Aston Villa hi club lian tak a ni tih pawh ka hria.

"Villa-in a tum ramte a thlen theih nana puih ve hi ka duh a, ka career-a tawnhriat ka lo neih tawhte hi ka chhawr ṭangkai theih ka beisei a ni," a ti a, Villa tan player pawimawh nih a tum.

Goretzka hian Bayern Munich tan Bundesliga nomawi ringawt pawh vawi kua a chawi tawh a, 2019-20 season-ah phei chuan treble champion a nihpui - German club-ah hian nomawi chawi theih ang chu a chawi kim vek.

Europa League champion Aston Villa hian an league match hmasa berah beisei an phak lo a, Brighton & Hove Albion chu 4-0 tehmeuhin an ngam lo. Thawhṭanni zanah league match khelh tur an nei zui leh dawn a, Arsenal chu zan dar 12:30-ah an mikhual ang.

Arsenal pawhin an lo ngaihven tawh Goretzka chuan, "Kar tin deuh thaw, club liante nena inhmachhawnna chance a awm dawn a, chu chuan min tiphur hle. Hei tak hi Bundesliga nena a danglamna a ni a, Germany-ah chuan club lian hamchhawn tur an tam lo," a ti - chona thar a hmachhawn dawn e.