De Zerbi vanga Spurs zawm Marmoush

Manchester City chhuahsan a, Tottenham Hotspur zawmtu Omar Marmoush chuan coach Roberto de Zerbi thusawiin a hneh thu sawiin, Italian coach vanga London club pan a nih thu a sawi.

Kum 27 mi forward hian Spurs hi season khat chhung atan loan-in a zawm a, London club hian £60mtd-in a nghetin an la lut zui thei ang. Marmoush chuan, "He club ka zawm thei hi ka lawm hle.

"Ka ṭhian tharte nena inkhelh ho ka châk tawh a, fans ho hmuh pawh a châkawm tawh hle," a ti - Tottenham Hotspur hian zanin dar 10:00-ah league match khel turin Newcastle United an mikhual dawn a, an duh chuan Marmoush hi an chhawr nghal thei ang.

Egypt forward chuan, "Tottenham hi England-a club lian ber zinga mi a ni a, an hmachhawpte hian min tiphur hle. Head coach nen pawh kan inbia a, a thusawiten min hneh hle. Ṭha tak kan thawh dun theih ka beisei a ni," a ti.

Kum 27 mi Marmoush hian nikum January khan Eintracht Frankfurt chhuahsanin, City chu £59mtd-in a zawm a, Erling Haaland-a thachhang dawltu a ni. City tan inelna hrang hrangah match 62 khelin, goal 16 a khung a, assist vawi ruk a nei tel.

Egypt international hian season hman zawh takah khan match 36 khelin goal riat a khung a, assist vawi thum a nei. Mahse, match 36 zingah hian vawi 16 chiah inkhel bul a ṭan a, khelmuala minute 90 khelh tluan hi vawi thum chiah a nei!

Tottenham hian tun nipuiah West Ham aṭangin Mateus Fernandes (£85mtd), Newcastle United aṭangin Sandro Tonali (£100mtd), Brighton & Hove Albion aṭangin Jan Paul van Hecke (£52mtd) leh City aṭangin Savio (£75mtd) te an la lut tawh a, defender pahnih Marcos Senesi, Andy Robertson leh goalkeeper Martin Dubravka te chu free transfer-in an la bawk.

Mahse, an league match hmasa berah Brentford chu 3-0 ngawta ngam loin an mualpho a, hetihlai hian Savio leh Marmoush an la la lut lo thung. Spurs hian Savio an lakluh hnuah Charlton Athletic chu League Cup-ah 5-1 in an sawp a, Savio hian a club thar tana a match hmasa berah goal a khung nghal- zaninah Savio leh Marmoush an inlan nghal lo ang tih a sawi theih loh.