England-a kir tur Jose Mourinho

European football-a club inelna sang ber, Champions League league stage-a team inhmachhawn tur a chiang ta a, Premier League champion Arsenal chuan Real Madrid an hmachhawn dawn - Jose Mourinho England-ah a kir dawn tihna a ni.

Gunners hian Mourinho enkawl team hi an hmachhawn dawn a ni mai lo a, khualmualah Bayern Munich an lenchilh a ngai dawn bawk - Mikel Arteta naute hian Borussia Dortmund leh Napoli an hmachhawn tel dawn avangin a awlsam lo ang.

Champions League-a season hnih ngawt an inlan loh hnuah Manchester United an lo kir leh ta a, Bayern Munich leh Atletico Madrid hmachhawn dawn mah se, an hmachhawn tur dangah club hmachhawn châkawm lo ngawih ngawih an awm lem lo a, knockout round luhna chance a sang hle.

Manchester City-in Enzo Maresca hoin UCL an hmachhawn dawn a, a awlsam dawn lo. Champion lai Paris St-Germain chu Etihad Stadium-ah an mikhual dawn a, Nou Camp-ah Barcelona an lenchilh dawn bawk.

Premier League club zingah Liverpool hmabak chu awlsam bera chhal ngam a ni. Reds hian Atletico Madrid leh Inter Milan chu fixture an neih hautak deuh a ni a, knockout round chu a chiang ang deuhthawin a sawi ngam.

Europa League champion Aston Villa-in PSG an mikhual dawn a, Borussia Dortmund, Barcelona leh Galatasaray an hmachhawn dawn bawk - a awlsam lo tawp ang.

UCL-ah hian league phase-ah team tinin match riat ṭheuh an khel ang a, a sang pariatin last 16 an lut nghal ang a, pakuana aṭanga 24-na ten last 16 luh inchuhin playoff an khel leh dawn bawk a ni.