Chelsea tan Welbeck a inlar ta

Nipui transfer laia Chelsea zawmtu Danny Welbeck chuan, Ningani zan khan League Cup-ah club thar tana a goal hmasa ber a khung. Blues hian Luton Town chu 2-0 in an hneh a, goal pakhat zawk hi Luton defender Hakeem Odoffin-a'n an lama a tihluh a ni.

League Cup second round inkhel dangah Fulham chuan 3-0 in AFC Wimbledon an hneh a, Emile Smith Rowe, Rodrigo Muniz leh Gonzalo Garcia ten goal an khung.

A goal har

Stamford Bridge-a inkhelah Blues an chungnung tluan zak a, mahse goal khung an harsat thung. Cole Palmer-a'n Estevao Willian nen mawi taka an in pass hnuah, Luton keeper Josh Keeley a paltlang thei lo.

Keeley hian Reece James-a freekick pet a dansak bawk a, Brazilian forward Estevao pawhin a hun ṭha neih goal zawnah a kaltir thei lo. Palmer-a'n a hun ṭha neih a hlah bakah Morgan Rogers chuan goal bar a pet per bawk a, goal hmaah Blues an hriam tawk lo a, goal lut loin chawlhlawk an hmang.

Hello Welbeck

Second half-ah erawh London club an insiamṭha a, minute 50-naah Malo Gusto cross chu Welbeck-a'n tauh lutin Chelsea hma a hruaipui. Kum 35 mi Welbeck tan Blues tana a goal hmasa ber a ni a, a vawi khat inlannaa a nih bawk avangin goal hlu bik a ni.

Minute 78-naah Estevao-a shot chu Hatters (Luton sawina) defender Odoffin-a'n an lamah a tilut palh a, Luton tan thawhchhuah ngaihna a awm tawh lo. Palmer leh Jamie Gittens ten an hun ṭha neih an chhawr ṭangkai thei lo a, kum 24 mi Palmer hattrick siam theihna tur khawp chance nei mah se goal a khung lo.

Alonso a lawm

Chelsea manager Xabi Alonso chuan, "Khawng taka Luton an inven avangin an fakawm takzet a, kan tan dawhthei taka kan khelh kha a ngaih phah. First half kha a harsa zual a, mahse second half-a Welbeck-a'n goal a khung hnu kha chuan a ziaawm deuh," a ti.

An midfielder Enzo Fernandez a khelhtir loh chungchangah Spanish manager chuan, "Professional a ni a, training pawh ṭha takin a nei. Pathianniah match kan nei leh nghal dawn avangin a chungchangah sawi tur ka nei lo," tiin Manchester City nena sawi zawm mek midfielder chanchin a sawi tam duh lo.

Blues keeper thar Martinez?

Blues tan an nipui transfer-a an lak thar zingah Pep Chavarria, Maxence Lacroix, Valentin Barco, Morgan Rogers leh Welbeck ten bul an ṭan a, Emmanuel Emegha chu bench-ah a ṭhu tluan.

Hetihlai hian Mike Penders-a'n si ban a nghak a, Robert Sanchez hahdamna hun pek a ni. Kum 44 mi Alonso-a'n Martinez lak luh a duh a, Argentine keeper nen hian an inrem tawh niin Fabrizio Romano pawhin a ziak tawh a, Chelsea-in World Cup nomawi chawi tawh keeper an nei thuai dawn e.

Pathianni zan dar 6:30-ah Blues hian Brighton & Hove Albion an hmachhawn leh nghal dawn a, chawlh an neih tlem avangin Brighton hneh turin an tha an thlah a thiang dawn lo.