Brighton-in Conference League inpetkai

Ningani zan Conference League playoff second leg khelhah, Brighton & Hove Albion chuan 4-0 in Norwegian club Tromso an sawp a, first leg-ah goal khung loa an lo inhnehtawk tawh avangin Brighton an tlang.

American Express Stadium-a inkhelh Brighton-in inkhel an thunun tluan a, first half-ah Charalampos Kostoulas, Maxin De Cuyper leh Mats Wieffer ten goal an khung a, chawlhlawk an hman meuh chuan chak tur a chiang thuak tawh. Hun tawp hma hretin Olivier Boscagli-a'n goal a khung lehin, nuamsa takin Seagulls an chak.

Brighton tan season thara an match lina chiah a ni a, kar hmasa khan Aston Villa chu 4-0 thoin an lo hneh tawh. First leg-a Tromso an inhnehtawkpui ṭum chiah kha goal an khung lohna awm chhun a ni a, goal erawh an la chhuah lo.

Kumin Conference League-ah club langsar an tam a, Seagulls hmachhawn theih zingah AS Monaco, Freiburg, Ajax leh Atalanta te an awm a, kum dang zawng aiin nomawi inchuh boruak a sang mai thei.

Conference League an khelh dawn avangin lawm viau mah se Seagulls hi thlamuang taka awm hman an ni lo a, Pathianni zan hian Chelsea an hmachhawn leh nghal dawn. Mahse Fabian Hurzeler-a nauten bul an ṭan dan enin, Xabi Alonso hnuaia indinthar hna thawk mek Blues hi hlau tur an ni bik lo.