Striker nei lo Barca an buai lo

Spanish champion Barcelona chuan striker nei loin season bul ṭan mah se buaina an tawk lo, a chhan chu Raphinha an nei tlat. Catalan club hian Ningani zan La Liga inkhelah Athletic Bilbao chu 2-0 in an hneh a, Brazilian forward Raphinha leh Fermin Lopez ten goal an khung.

Nipui transfer laiin Barca-in an striker pahnih Robert Lewandowski leh Ferran Torres te an chân a, an chil tiputtu ber Julian Alvarez lak an harsat bakah Lautaro Martinez duh mah se, indawrna mumal tak a la awm loh avangin striker an nei lo.

Mahse hei hi Raphinha-a'n a chhawr ṭangkai a, an match hmasa pahnihah striker position-ah khelin goal thum a khung tawh. Kum 29 mi forward hian khawi hmunah pawh khel se a ṭha tawk tih a pholang.

Chutihrualin Barca tan ngaihṭha taka awm a la thiang lo thung a, season laihawla match an ngah hunah emaw club lian an hmachhawn hunah an la talbuai theih avangin no. 9 position chelh thei an la mamawh.

An hmatawng nghet ni tura an duh ber Alvarez erawh a club khelh mekna, Atletico Madrid chuan Barcelona lakah hralh an tum loh thu an sawi tawh a, Hansi Flick-a tan striker dang melh mai a finthlak tawh zawk ang.

Barca hi Argentine forward tho Martinez bakah, Arsenal forward Viktor Gyökeres, Club Brugge tana khel mek Nicolò Tresoldi leh Borussia Dortmund striker Serhou Guirassy te te nen sawi zawm an ni mek bawk.

August 31, Thawhṭanni zan dar 1:00-ah Barca hian Valencia an hmachhawn leh nghal dawn a, Raphinha bawkin striker hna a chelh leh a rinawm. Leeds United forward hlui hian goal khung leh ngei a tum bawk ang.

August 27, Ningani zan vek khan Osasuna chuan 2-1 in Celta Vigo an hneh ve bawk a, Iago Aspas-a'n Celta hma hruaipui mah se Osasuna tan Kike barja leh Ante Budimir ten an sut.