KDB a inpeih tawh

Napoli midfielder Kevin De Bruyne chu inkhel turin an inpeih leh tawh a, Pathianni zan dar 10:00-a Cesc Fabregas-a enkawl Como an hmachhawn hunah bul a ṭan theih a beiseiawm.

Season hmasa khan kum 35 mi De Bruyne hi hliamin a tlakbuak a, a inkhelh tam tawk loh bakah squad-ah a awm ve pawhin a hun tam zawk chu bench-ah a hmang.

An manager hlui Antonio Conte nen an khelh dan phungah an ngaihdan a inang lo a, Conte-a'n goal a nawr tir tam tawk lo chu Belgian midfielder hian a lo sawisel tawh. An thu a inhmuh loh avangin KDB hi chhuak tur anga sawi a awm hman a, mahse Italian coach zawk a chhuak.

Conte a chhuah takah chuan Stadio Diego Armando Maradona-ah KDB a châm a, an manager thar Massimiliano Allegri hnuaiah bul a ṭan thar leh turin a inpeih tawh hle.

August 23, Pathianni zana season thar atana an match hmasa ber an khelh ṭumin, Manchester City midfielder hlui hian bul a ṭan lo a, mahse minute 66-naah lutin goal leh assist a nei nghal a, 2-0 a an chak theih nan a thawh hlawk hle.

Napoli hian season hmasaa loan-a an hawh Rasmus Hojlund leh Alisson Santos te chu a ngetin an la lut a, Vanja Milinković-Savic chu Torino aṭangin an la lut bawk. Chelsea aṭangin Benoît Badiashile chu an hawh bawk a, zaninah a inlan theih a rinawm.

Hetihlai hian Man City-a De Bruyne-a khelhpui ṭhin Gabriel Jesus chu lak an tum nia sawi a awm a, mah se indawrna mumal tak a la awm lo thung.