Benfica-in Europa League khel dawn

Portuguese club lian Benfica chuan Ningani zan khan, Europa League playoff second leg-ah Aarhus Gymnastikforening (AGF) chu 3-1 in an hneh a, first leg-ah 3-1 bawka an chak tawh avangin 6-2 in hnehna an chang a, Europa khel turin an inpetkai.

Benfica tan season hmasa UCL-a boruak nei lian tak Gianluca Prestianni chuan goal hnih a khung a, Rafa Silva-a'n goal khat a thawh ve bawk. AGF tan Rasmus Carstensen-a goal khungin awmzia a nei lo.

Argentine forward Prestianni-a'n goal mawi bik hmangin a team hma a hruaipui a, a goal hnihna erawh defender-in an dan pial vanga lut a ni thung. Prestianni goal khung karah hian Rafa-a'n goal a khung ve bakah, AGF defender Rasmus Carstensen-a'n goal mualpho dalah goal khat a khung ve bawk.

Inkhel dangah Turkish club pahnih Besiktas leh Trabzonspor te chu an chak lo ve ve a, Besiktas hi Lithuanian club Kauno Žalgiris lakah si khat faiin chak lo mah se first leg-ah goal thum an khung tawh avangin an tlang tho.

Trabzonspor erawh beiseina sang tak nen Hungarian club Ferencváros tlawh mah se, minute 13-na leh 56-naah red card an hmu a, player pakuaa an khelh avangin an thochhuak thei tawh lo. Mohamed Salah-a'n a club thar tan goal a khung theih lok bakah, Andre Onana-a'n goal li ngawt chhuahin aggregate-ah 5-0 in an chak lo.