Alvarez-a'n Arsenal zawm tum lo

Atletico Madrid striker Julian Alvarez chuan Arsenal zawm tumna a nei lo a, Argentina international hian Gunners manager Mikel Arteta nen an inbiak ṭumin, Spanish coach hi London club pan tumna a neih loh thu a hrilh!

Kum 26 mi Alvarez hian Barcelona pan a duh a, mahse, Madrid khaw club hian an elpui club hnenah an striker ṭha hi kaltir an duh lo. Club thuneitute chuan Alvarez hi a mimal tak pawhin an hmu tawh a, Barca hnena an hralh loh tur thu chiang takin an hrilh tawh.

Atletico Madrid hian Alvarez hi hralh an duh lo ngawr ngawr a ni lo a, an elpui Barca hnena kaltir an duh lo. Club director Mateu Alemany leh Arsenal thuneitute chu London khawpuiah indawrin, Alemany hian an striker manah pound maktaduai 128 an beisei thu thlengin a sawi.

Hetiang boruak karah hian Barcelona president Joan Laporta chuan Alvarez an la ngaihven reng thu kar hmasa khan a sawi a, mahse, Atletico chuan thuchhuah siamin, "Barcelona-a a kalna chance chu 0% a ni e," an ti a, club thuneitute an inlungrual thu an sawi tel bawk.

Arteta-a'n Alvarez a dawr zui a, mahse, Alvarez-a'n pan a tum loh thu a lo hrilh. Reporter rintlak David Ornstein chuan, "Arsenal pawh hian club nen inremna nei ringawt mah se, Alvarez-a duh lo chung lakluh an tum bik lo.

"A thleng lo tawp ang, chu ka ti thei lo a, mahse, Gunners a pan hi ka ring lo zawk," a ti - Alvarez hian ni thum ngawt chu Atletico training a zawm lo tawh a, Inrinni zana 3-1 ngawta Sevilla an hnehna inkhelah pawh a inlan lo.

Arsenal hian tun nipui transfer-ah Bruno Guimaraes, Ezri Konsa leh Christos Tzolis te an lakluh tawh bakah Piero Hincapie an la nghet. Mahse, Alvarez hma hian Bradley Barcola, Morgan Rogers leh Vinicius Junior te an lo ngaihven tawh a, an chang lo vek!

Mikel Arteta team hian zanin dar 12:30-ah league match an khel dawn a, an match hmasa bera 3-0 a Coventry City hnehtu hian Unai Emery-a enkawl Aston Villa chu khualmualah an lenchilh ang.