Aizawl FC-in goal nga bawk an khung

Star Cement MPL13-ah Aizawl FC-in Inrinni tlai khan Lawngtlai club MLS FC 5-2 in an sawp a, match hnih lekah goal 10 an khung tling der. Season liam ta khan AFC-in match hnih khelh zawhah goal riat an khung a, league round khelh zawhah goal 40 an khung a, kuminah season khata goal khung tam ber record khum thei dinhmunah an ding.

Aizawl FC tho hi season khata goal khung tam ber record kawltu an ni a, MPL11 khan league round-ah goal 44 an khung. Inrinni chawhnu inkhelah Zomuansanga'n goal hnih a khung a; Stephen Lalrinfela, Vincent Lalduhawma leh JH Remlala ten goal khat ṭheuh an khung ve bawk.

RG Stadium-a inkhelah Aizawl FC an chungnung nghal a, Laltlanzova'n goalkeeper chauh a hmachhawn hnuah a khung thei lo. Minute 14-na lekah Stephen Lalrinfela'n a tauh goal a, a tauh hla deuh mah se a dah dik em avangin Lawngtlai keeper tan dan a harsa.

Coach F. Lalrozama kaihhruai MLS an bet mawl tawp lo a, AFC tlarhnung nuam sain an awm thei lo. Chutihrualin player ṭha danglamna a lang a, minute 36-naah Vincent Lalduhawma'n ṭha zeta a ball a lakluh hnuah 'cool' takin a khung.

Second half ṭantirhah MLS-in freekick an hmang ṭangkai a, K. Lalhmangaihkima pet chu keeper RS Lallawmzuala'n a khawih pha lo chiah chiah a, goal ban a per hnuah AFC keeper hi fuhin goal-ah a lut. RS-a'n Aizawl FC jersey a hak hnuah a vawi khat nan goal a chhuah a, ama khung anga ziahluh a ni.

Mahse, AFC an talbuai phah lo. Minute 53-naah MLS keeper Chhana tihper chu Zomuana'n goal-ah a chantir a, minute 60-naah Khawbel tlangval hian a tauh lut leh bawk. MLS tan Lalfamkima'n minute 75-naah siphurh sut ṭhen mah se JH Remlala'n minute 84-naah Aizawl FC chak nemnghehna goal a khung.

Aizawl FC 5-2 in an chak a, MLS erawh an tlawm bakah minute 80-naah K. Lalhmangaihkima hnawhchhuah a nih avangin player 10 in an khelh phah. Tuithiang midfielder Hmangaihkima hi September 1, Thawhlehni tlai dar 3:00-a Chanmari FC an hmachhawn hunah a inlan thei dawn lo.