Dintharin Kanan lakah phuba an la

Football thiam veng Dinthar FC tan veng ṭhenawm Kanan FC hneh loh a tlawm thlak a, I Day Football quarterfinal-a an chak loh hnuin Maimawms-in Star Cement MPL13-ah phuba an la. Inrinni zan khan Dinthar hian Kanan hi 3-1 in an lehthal a, coach Laldampuia hoten point thum an hlawh chhuak.

RG Stadium-a inkhelah Kananin bul an ṭan a, Crespo Vanlalhriatpuia ball pet chu Dinthar keeper-in dan per chu minute 11-na lekah Kanan forward Malsawmzela'n goal-ah a chantir. Dintharin nawr ngial mah se first half-ah siphurh an sut thei lo.

Inkhel thununtu Dintharin second half-ah chance ṭha an hlah tawh lo a, second half ṭan chiahah Vanlalhriatrenga'n a tauh lut nghal. Maimawms goal bawh a na zui a, Kananin an khan tawh hle.

Ricky Lalramnghaka'n chance ṭha bik a hlah hnuah minute 65-naah goal pawimawh a khung a, inkhel thununtu Dintharin 2-1 in hma an hruai. Coach Dampuia hoten a tawp an khar ṭha a, injury time-ah PC Rosangzuala'n khung belhin 3-1 in hnehna an chang.

Dinthar tan point thum satliah a ni lo a, Aizawl West Derby-ah hnehna an chan avangin chanchin lawmawm a tling a, MPL khelh hmabakah an phur sawt ang. Kanan erawh match hmasa pahnihah an chak lo a, I Day Football final lut mah se relegation battle khel tura ngaih an ni.