F. Lalrinpuia Memorial FC an champion

Mizoram Football Association buatsaih MFA Futsal Division One 2026-27 Season Opening Tournament final-ah F Lalrinpuia Memorial FC-in FC Muthi 4-1 a hnehin an champion. Ramthar Veng club F Lalrinpuia Memorial FC tan C. Laldinpuia'n goal hnih a khung bakah Jonathan Lalfakawma leh Jonathan Laldinpuia ten goal khat ve ve an khung.

Champion team hian nomawi leh Rs 25,000 an dawng a, Ramthar Veng club champion-na kawnga pawimawh Jonathan Lalnunzira chu best player-a thlan a ni. F. Lalrinpuia Memorial FC hi club indinthar ni mah se futsal lamah sulhnu an nei ṭha a, MFA Futsal League ṭantirha Whetstone FC te tho kha an ni.

Club hming put chhan F. Lalrinpuia hi MFA hruaitu hlun a ni. Er Rinpuia hi kum 1989 khan MFA Office Bearer a ni tawh a, Mizoram Volleyball Association-ah pawh President ni tawhin kum 2017-2020 chhung khan Mizoram State Sports Council-ah Finance Secretary a ni bawk. MFA-ah honorary vice president hna a chelh laiin January 20, 2023 zan khan cancer natna vangin a thi a, Mizoram infiamna tan channa lian tak a ni. Tun ṭumah hian F. Lalrinpuia hriat reng nan Ramthar Veng ṭhalai an rawn thawk chhuak a, nomawi nen a tawp an khar.