Liverpool chak zo lo leh ta - lawmna & lawm lohna!
Premier League champion tum zinga mi Liverpool-in tun season-ah chak an la nei lo - an league match hnihnaah Nottingham Forest chu 2-2 in an inhnehtawkpui a, match hnih an khelh tawhah an khingpui an la draw ve ve!
Coach thar Andoni Iraola hnuaia Anfield-a an match hmasa berah Reds-in chak beisei mah se, goal an chhuah hma hle. Minute 24-naah Dan Ndoye chuan Forest tan hmahruaina goal a khung a, Anfield a reh.
Reds-in second half-ah si phurh an sut a, Cody Gakpo siamsak ṭha zet chu Alexander Isak-a'n mawhphurhna lain, goal-ah a chantir a, 1-1 a ni. Mahse, Forest an beidawng lo - minute 70-naah penalty an hmu a, Morgan Gibbs-White chuan goal-ah a chantir.
Anfield-ah Liverpool-in tlawm an duh bik lo. Minute 82-naah Florian Wirtz chuan ṭha zetin Víctor Muñoz tan a siamsak a, si phurh a sut - goal dang erawh a lut tawh lo a, Liverpool-in an league match hmasa pahnih aṭangin point hnih chiah an la hlawh chhuak!
Hello Barcola = lawmna!
Liverpool-in an league match hmasa pahnihah hnehna an chang zo lo a, mahse, lawmna tur erawh an nei - hun rei tak an rim tawh, Paris St-Germain forward Bradley Barcola chu Reds-ah a lut dawn ta nge nge.
Liverpool leh PSG hi pound maktaduai 123-in an inrem a, Barcola man atan chuan tam deuh niin lang mah se, PSG-in an beisei zat £145mtd aṭanga chhut erawh chuan Liverpool an che fuh zawk.
Reds hian £106mtd an pe phawt ang a, a khelh ṭhat dan a zirin £17mtd chu pek belh leh tur a ni. Barcola hian medical neih a la hmabak thung a, he thuziak i chhiar meuh chuan an in la lut fel tawh hial mai thei.
Hetihlai hian Liverpool hian right winger pawh an zawn chhunzawm zel a, Brighton & Hove Albion player Yankuba Minteh leh Crystal Palace forward Ismaila Sarr te pawh an thlithlai - an club dawrten thu lawmawm hrilh tur erawh an nei rih lo.
Mangṭha Gakpo = lawm lohna
Liverpool-in an league match hmasa pahnihah hnehna an chang zo lo a, Cody Gakpo-a'n match hmasa zawkah goal khungin, match hnihnaah assist a nei. Mahse, Forest an draw zawha Reds ṭantute thu hriat chu, Manchester City-in Gakpo an hnaih!
Kum 27 mi forward hi Manchester City bakah Tottenham Hotspur pawhin an duh a, mahse, City hian an chang zawk dawn niin a lang. Gakpo hian Enzo Maresca team pan hi a hreh lo nia sawi a ni a, Liverpool hian £85mtd aia tlawma hralh an tum lo thung.
Gakpo hian January 2023 khan Liverpool hi a zawm a, inelna hrang hrangah match 182 khelin goal 51 a khungsak a, assist vawi 24 a nei bawk. Liverpool hian Gakpo an hralh dawn a nih erawh chuan forward dang lakluh phawt an tum niin an sawi.
Hetihlai hian Newcastle United leh Forest an draw ṭumin, full back pahnih Milos Kerkez leh Jeremie Frimpong ten sawiselna an tawk nasa a, midfield a thawl ṭhin viau bawk - insiamṭhat an la ngai hle.