Chanmari daltu ruah leh Muanawma

Star Cement MPL13-ah champion lai Chanmari FC-in Zirtawpni zan khan Mizoram Police an hmachhawn a, ruahsur hnuaiah goal an khung theih loh avangin goal awm loin an inhnehtawk. Goalkeeper F. Lalmuanawma a che ṭha a, MPL10-a Police champion puitu keeper hi man of the match-a thlan a ni.

Rochhingpuia kaihhruai Chanmari FC-in match hmasa berah goal nga an khung nghal a, champion zia an lantir nghal. Mahse, passing game khel ṭhin Chanmari tan ruahsur hnuaia inkhelh a harsa a, RG Stadium-ah tui a inpaih chhuah chak loh avangin ṭum dang an game an pha lo.

Chutihrualin Police lamin tawnhriat an nei ṭha a, huaisen taka an khelh avangin point khat an phu. First half-ah R. Malsawmtluanga freekick leh corner kick hmangin Police-in Chanmari tlarhnung an rum ṭhaih a, Zothanmawia (T. Mawia) paltlangna tur khawp a ni lo thung.

Chanmari lamin chance nei bawk mah se Mizoram keeper Muanawma'n a dang thei zel a, Police tlarhnung an su tlang thei lo. Chutihrualin Chanmari an vanduai tel ve bawk a, Lalthanzuala (TZ-a) ball tauhin crossbar a per a, goal-ah a lut lo. Minute 90 chhungin goal khat hmuh tur a awm lo a, 0-0 in inkhel a tawp.