Alvarez tel loin Atletico an chak

Diego Simeone enkawl Atletico Madrid chuan Inrinni zan khan 3-1 in Sevilla an hneh a, khualmuala an inkhelah hian tun hnaia chanchin ngah tak Julian Alvarez chu squad-ah hmuh tur a awm lo.

Madrid club tan World Cup champion squad-a tel Alex Baena-a'n goal hnih a khung a, Ademola Lookman-a'n goal khat a thawh ve bawk. Sevilla tan Miguel Sierra-a goal khat khung chu scoreline cheimawina chauh a ni.

Kum 56 mi Simeone chuan, "Kan khel ṭha hlein ka hria. Sevilla hi team ṭha tak an nih avangin kan fimkhur a, result ṭha tak kan hlawh chhuak. Baena a khel ṭha bawk a, World Cup an khelh hnuah hma a sawn hle," a ti.

Alvarez chungchang an zawhnaah Argentine coach chuan, "Player thiam chungchuang tak a ni a, kan player a nihna angin eng kawngah pawh ṭanpui turin kan inpeih. Football-ah chuan eng thil pawh a thleng thei a, he thil hi Alvarez vanga sawi chhuak pawh ka ni lo, kum dangah pawh ka lo sawi ziah tawh a ni," a ti.

Kum 26 mi Alvarez hi Arsenal leh Barcelona ten lak luh an tum a, Barca hian thawm nei lianin ngam huai hle mah se hle mah se Atletico-in an elpui club lakah hralh an tum lo.

Manchester City forward hlui hian squad a zawm lo a, amahin training a nei mek. Sevilla hmachhawn lo mah se September 5, Inrinnia Athletic Bilbao an tlawh hunah a inlan leh tawh a beiseiawm.