Timberwolves-ah Kuminga lut

Jonathan Kuminga chuan Minnesota Timberwolves a zawm a, kum hnih châm tura inremna neiin dollar maktaduai 13 a hlawh dawn. Kuminga tan a career-a a club pathumna tur chiah a ni.

Kum 23 mi Kuminga hian kumin June thla khan Atlanta Hawks a chhuahsan a, Congolese power forward hian $24.3 mtd hlawh a phut chu Hawks hotuten an remtih loh avangin a chhuak a, club nei loin a awm.

Los Angeles Lakers pawhin lak tum mah se Wolves an rawn lang a, Kuminga hmin turin hun an duh rei lo. Kumin February-a Golden State Warriors a chhuahsan hnua Western Conference lama khelh lehna hmasa ber tur a ni a, Kuminga hian Hawks tan thla li bak a khel hman lo.

Kuminga hian season hmasa khan Warriors tan match 20 a khel hman a, vawi 13 bul a ṭan. Match tinah point 12.1, rebound 5.9 leh assist 2.5 nei ziah ang a ni a, Stephen Curry kianga a khelh chhungin a khel chhe hran lo.

Mahse kumin kum tir lam khan Warriors-in Kristaps Porzingis an duh zawk avangin an inthleng a, Hawks-ah an kaltir. Eastern Conference club-ah Kuminga a tlatlum lo a, match 16 a khelh chhungin vawi khat chiah bul a ṭan. Playoff-ah champion zui ta New York Knicks hneh loin an tla.

Wolves hian Kuminga hma hian LaMelo Ball leh Josh Green te chu Charlotte Hornets aṭangin an lo la lut tawh a, an pahnih aiah hian Naz Reid chu an chhuahtir ve thung.

Player langsar leh tawnhriat nei ṭha an lak bakah Anthony Edwards, Rudy Gobert, Jaden McDaniels leh Donte DiVincenzo te an neih sa bawk avangin Wolves-in champion an inbeisei ngam ang.