Amorim-a enkawl Milan an kal zel

AC Milan chuan Ruben Amorim-a kaihhruaina hnuaiah hnehna an chang zel a, Inrinni zan khan kai thar Venezia chu 2-0 in an hneh. Paris St-Germain aṭanga an lak luh Goncalo Ramos-a'n goal khungin, Venezia defender Redouane Halhal-a'n an lamah a tilut bawk.

Kum 41 mi Amorim chuan "Kan khel ṭha takzet a, mahse hmasawnna tur kan la ngah hle. A chang chuan kan khingpuiten duh dan ang takin kan khelhsak niin ka hria. Goal kan nawrin tlarhnung lam kan ngaihthah ṭhin a, defender te hi engtik lai pawha inring turin ka duh a ni," a ti.

Milan hian season hmasa an khelh ṭhat tawk loh avangin, tun season-ah pawh Europa League an khel dawn a, Manchester United coach hlui hi ruaiin indinthar leh an tum. Portuguese coach hnuaiah pre season hmang ṭha tawk lo mah se, friendly match hnuhnung bera Man United an hneh hnuah an boruak a ṭha leh tawh hle.

Hetihlai hian Milan hian an forward Rafael Leao chu Galatasaray-ah an hralh a, Turkish club hian Portuguese forward manah hian euro maktaduai 45 bawr vel an seng. Milan hian Leao thlakna tur melh nghalin, Nottingham Forest forward Omari Hutchinson nen mimal thilah an inrem tawh niin Fabrizio Romano-a'n a tarlang.

Inrinni zana Forest-in Liverpool an inhnehtawkpui ṭum khan, kum 22 mi Hutchinson hi a inlan tawh lo. Tun nipui transfer-ah Milan hian player pathum an la lut tawh a, Ramos bakah Diego Moreira leh Mario Gila te an la lut tawh a, Gila hian Venezia lakah bul ṭan mah se Moreira erawhin squad a la zawm lo.