PSG-in mualphona pumpelh
Ligue 1 champion lai Paris St-Germain chuan season tharah chak ni an la hmu thei lo a, Zirtawpni zan khan Lille chu 2-2 in an inhnehtawkpui hram. Luis Enrique naute hi a lawm zawkah an ṭang a, hei hian inkhel a hrilhfiah.
Stade Pierre-Mauroy, Lille-a inkhelah game a rang takzet a, boruak a nung nghal hle. PSG tan Achraf Hakimi-a'n goal ruakah a khung thei lo a, Lille-in an hrem. Arsenal forward hlui Olivier Giroud-a ball pek ṭha zet chu Hakon Haraldsson-a'n kawt zetin a khung.
Goal hmasa ber a luh hnuah a chhunzawmna an khung lawk thei lo a, minute 84-naah Dilane Bakwa-a'n mawi zeta pet kual lutin an hmahruaina a belhchhah a, PSG an chak lo angah a ngaih theih tawh.
Mahse Paris club-in an beidawn duh loh rah an hmu a, hun pek belh minute khatnaah Vitinha-a'n an siphur sut ṭhenin Portuguese midfielder bawk hian Marquinhos-a tauh luh tur a siamsak a, hun tawp zui nghalin PSG an him hram.
Hun tawp thlenga an ṭan avangin mualpho lo mah se PSG tan result ṭha a ni lo a, an khelh danah league nomawi kawl mektu leh Champions League champion lai an ni tih a hriat loh.
PSG hian tun season-ah bul an ṭan ṭha tawk lo a, Super Cup-ah Aston Villa hneh nghal mah se Trophee des Champions-ah Lens an hneh lo a, league match hmasa berah Rennes chu 2-2 in an lo inhnehtawkpui tawh bawk.
Hetihlai hian Spanish coach Enrique chuan, "A tir lamah khel ṭha tawk lo mah ila chak duhna thinlung kan pu a, chak kan phu ka ti bawk. A tawp thlenga huaisen taka an beih avangin ka naute ka chhuang hle.
Match hnih aṭanga point hnih hlawhchhuah hi a tam lo teh meuh mai, mahse nikuma Lille leh Rennes nen kan inhmachhawnna nen kan khaikhin chuan point kan hmu tam zawk a, hma kan sawn tihna a ni," a ti a, naute a chhan.
French champion tan an player lak thar zingah Maghnes Akliouche leh Ferran Torres ten bul an ṭan a, Lucas Digne leh Mika Godts ten bench aṭangin an lut bawk. PSG hian September 5, Inrinniah Monaco an hmachhawn zui dawn a, an chak zo lo leh a nih chuan Enrique leh a naute tan pressure a awm ṭan ngei a rinawm.