Goal nga nena bul ṭantu Bayern

German champion Bayern Munich chuan Zirtawpni zan khan tun season Bundesliga-a an match hmasa ber an khel a, Vincent Kompany naute hian an mualah 5-1 in Stuttgart an sawp nghal.

Bayern tan Dayot Upamecano, Michael Olise, Aleksandar Pavlovic leh Luis Diaz ten goal khat ṭheuh an khung bakah Stuttgart defender Josha Vagnoman-a'n an lamah a ti lut palh. Vagnoman hian a team tan goal khat khung ve mah se an mualphona a hliah zo lo.

Bavarians midfielder Jamal Musiala a awm loh avangin tun nipui transfer-a an lak thar, Nathaniel Brown chu Kompany-a'n attacking midfield hna a chelh tir a, Brown hi left back ni mah se midfield-ah a khel chhe lo.

Kum 23 mi Brown hi nipui laia an lak luh tho Ismael Saibari-a'n minute 60-naah a thlak a, Moroccan forward hian goal khung lo mah se a ṭhiante goal khung tur vawi hnih a siamsak hman. An player tharte an chet ṭhat avangin Belgian coach tan a thlamuanthlak ang.

Hetihlai hian Bayern thiampuipa Harry Kane-a'n goal a khung ve lo a, minute 83-naah rawlthar Lennart Karl-a'n a thlak. English forward hian season thara league goal hmasa ber khung turin a nghah rih a la ngai dawn.

Inkhelh banah kum 40 mi Kompany chuan, "Stuttgart kha an chak em em a, a tir lamah phei kha chuan khelh an harsa hle. Mahse dawhthei takin kan khel a, a tawpah chuan a phu zawkin hnehna kan changah ka ngai," a ti.