Man United-in goal zawnah an pet lo
FA Cup third round-ah Manchester United-in Molineux Stadium-ah Wolverhampton Wanderers lenchilhin goal zawnah an pet lo a, Argentine keeper Sergio Romero khelh ṭhat zarah goal awm loin an inhnehtawk. United leh Wolves hian Old Trafford-ah replay an khel leh ang.
A goal lo
Ole Gunnar Solskjaer-a'n bul ṭan tur zingah Marcus Rashford a telh lo a, damlohna vangin Anthony Martial squad-ah a awm lo. United-in an ṭhat dan berin an khel lo a, khelmualah pawh an ṭha lo tih a hmuh theih. Wolves pawhin an player pawimawh an awltir ve tho avangin United tan chhuanlam a tling lo a, first half-ah inkhel a hmuhnawm tawk lo. United left back Brandon Williams-a'n Leander Dendocker lakah penalty hlawhchhuah inbeisei mah se referee Paul Tierney leh VAR-in an ṭawmpui lo.
Keeper pahnihah United keeper Sergio Romero-a'n hna a ngah zawk a, handball vanga Matt Doherty goal pawm a nih loh bakah Argentine keeper hian Pedro Neto leh Raul Jimenez te goal khung tur a dan sak. Wolves second keeper John Ruddy-a'n dan tur a nei lo a, chutihrualin Juat Mata freekick leh Marcus Rashford ten goal an khung teuh hle.
Fixture a harsa
Wolves hian Premier League ṭan hmaa Europa League qualifier aṭanga an khelh tawh avangin United nena an inkhelh hi tun season-a an match 36-na a ni tawh. United pawh Wolves nena replay an khelh dawn avangin January fixtures a hautak dawn hle.
Solskjaer hote hian League Cup semifinal an thlen avangin an ṭhenawm Manchester City nen vawi hnih an inkhelh a ṭul a, January thlaah hian Liverpool an hmachhawn tel dawn bawk nen Wolves nena second leg an khelh tur hian hmabak a tih harsat phah sawt ang.
Manager ngaihdan
Wolves manager Nuno Espirito Santo chuan, "Manchester United nen hi chuan kan ṭhat dan bera khelh a ṭul ṭhin avangin anni hmachhawn hi khualmual emaw a mahni mual pawh ni se a phurawm. Tun ṭuma kan intawnnaah hian first half khel ṭha tawk lo mah ila second half-ah kha chuan football ṭha tak kan khel a ni," tiin a sawi a, United leh Wolves hi replay bakah February 1 hian Premier League-ah an inkhel leh bawk ang.
Manchester United manager Ole Gunnar Solskjaer chuan, "Tlak nghal ai chuan replay khelh ka thlang zawk. Sergio Ramos khan ṭha tak takin a dang a, David de Gea tan pawh pressure a siam a, chu chu kan duh tak pawh a ni," tiin a sawi.
FA Cup Third Round
January 4, Inrinni
Wolverhampton 0 - 0 Manchester United
Manchester City 4 - 1 Port Vale
MANC : Oleksandr Zinchenko 20'; Sergio Aguero 42'; Taylor Harwood-Bellis 58'; Phil Foden 76'
POR : Tom Pope 35'
Leicester City 2 - 0 Wigan Athletic
LEI : Tom Pearce 19' (OG); Harvey Barnes 40'
Rochdale 1 - 1 Newcastle United
ROC : Aaron Wilbraham 79'
NEW : Miguel Almiron 17'
Fulham 2 - 1 Aston Villa
FUL : Anthony Knockaert 54'; Harry Arter 74'
AST : Anwar El Ghazi 63'
Watford 3 - 3 Tranmere Rovers
WAT : Tom Dele-Bashiru 12'; Nathaniel Chalobah 14'; Roberto Pereyra 34'
TRA : Connor Jennings 65'; Manny Monthe 78'; Paul Mullin 87' (P)
Southampton 2 - 0 Huddersfield Town
AFC Bournemouth 4 - 0 Luton Town
Bristol City 1 - 1 Shrewsbury Town
Millwall 3 - 0 Newport County
Rotherham United 2 - 3 Hull City
Burnley 4 - 2 Peterborough United
Birmingham City 2 - 1 Blackburn Rovers
Cardiff City 2 - 2 Carlisle United
Oxford United 4 - 1 Hartlepool United
Brighton & Hove 0 - 1 Sheffield Wednesday
Reading 2 - 2 Blackpool
Preston North End 2 - 4 Norwich City
Brentford 1 - 0 Stoke City
Fleetwood Town 1 - 2 Portsmouth